Ish-deputeti i LDK-së, Anton Quni, i cili kishte thënë fjalë të forta në seancën e fundit kur PDK-ja po e prishte koalicionin me partinë e tij, ka thënë se u qëndron pas atyre fjalëve.

Quni, atë kohë kishte thënë se e ka pasur ndërmend që të tërhiqet nga politika, por se po e mbajnë në të Hashim Thaçi e Kadri Veseli, të cilët thoshte se donte t’i shihte në burg, aty ku sipas tij edhe e kanë vendin.

Në një edicion special të “Interaktiv-it” në KTV, Quni ka thënë se ajo nuk ka qenë temë e ngritur nga emocionet, por qendërzim i bazuar në bindjen e tij, siç ka thënë “gjithnjë duke iu referuar fakteve dhe argumenteve”

“Unë do të vazhdoj edhe në mandatin e ardhshëm të luftoj krimin e organizuar e korrupsionin”, ka thënë Quni, teksa është përgjigjur me “absolutisht po” kur është pyetur nëse e ka fjalën pikërisht për Thaçin e Veselin.

“Këta dy janë përgjegjës, absolut”.

Quni ka thënë se në mandatin e ardhshëm, qoftë nëse merr postin e deputetit apo ndonjë post në Qeveri, “do t’i adresoj çështjet dhe do ta sensibilizoj këtë dukuri në mënyrë që organet e drejtësisë të fillojnë t’i trajtojnë ato prova që janë diku të mbuluara me pluhur, t’i nxjerrin mbi tavolinë dhe krimi e korrupsioni të fillojnë të çmontojnë nga institucionet dhe shoqëria”.

Por kjo nuk ka mbetur pa u komentuar nga përfaqësuesi i Vetëvendosjes në këtë debat, ushtaraku Shemsi Syla.

“Si vonë ju ka rënë ndërmend ta bëni këtë, sepse për tri vjet në bashkëqeverisje me PDK-në nuk provuar të bëni asgjë”, ka thënë Syla.

Ai ka thënë se vetëm Lëvizja Vetëvendosje ka potencialin për të bërë një gjë të tillë.

“Ne konstatojmë dhe marrim përgjegjësi dhe e bëjmë shtetin ligjor dhe shtetin e së drejtës, në të cilin do të ketë zero krim e korrupsion. Këtë tashmë e kemi dëshmuar me udhëheqjen në Prishtinë”, ka thënë Syla.