Presidentja Vjosa Osmani, ka folur në panelin mbi dialogun transatlantik dhe trashëgiminë e Madeleine K. Albright në Forumin 2000 në Pragë, Çeki.

“E gjithë bota është një vend më i mirë, më i sigurt dhe më paqësor për shkak të njerëzve si Sekretarja Albright. Populli i Kosovës ka pasur rastin të përjetojë drejtpërdrejt fuqinë transformuese të lidershipit të saj. Ajo ishte një person që qëndroi gjithmonë në anën e duhur të historisë”, deklaroi Osmani, shkruan arbresh.info.

Sipas Osmanit, Albright siguroi që të drejtat tona themelore të mbroheshin kur kaq shumë në mbarë botën as që e dinin që ekzistonim.

“Ajo bashkoi forcat me liderë të tjerë vizionarë si presidenti Havel në atë kohë për të na mbrojtur nga shkeljet më të tmerrshme të të drejtave të njeriut që shkojnë edhe përtej imagjinatës së një qenieje njerëzore.”

Sipas presidentet Osmani mënyra më e mirë për ta përshkruar ishte pikërisht në vitin 1999, menjëherë pas luftës, një nga vizitorët e parë që patëm ishte padyshim Sekretarja Albright.

“Ajo po fliste në qendër të Prishtinës. Dhe sapo populli i Kosovës e kuptoi se ajo po vinte, padyshim që të gjitha rrugët ishin përmbytur me njerëz. Ajo pothuajse nuk u lejua të fliste për shkak të brohoritjeve.”

Për Albright, presidentja Osmani shtoi se ishte nëna që “na dha mundësinë dhe ndriçoi botën tonë dhe rrugën tonë drejt lirisë dhe pavarësisë”.

“Pra, ajo e kuptonte më së miri dhimbjen e njerëzve tanë, sepse i është dashur të kalojë rrethana të ngjashme gjatë fëmijërisë së saj…Dhe në të njëjtën mënyrë, trashëgimia e saj na ka mësuar neve, popullit të Kosovës, se ne duhet t’i kthejmë vuajtjet, dhimbjet dhe përvojat tona në qëndrueshmëri dhe forcë për të ndihmuar të tjerët. Pra, ne mund të jemi një vend i vogël, por besojmë se kemi një zë të fuqishëm kur bëhet fjalë për shembujt që tregojmë. Sepse rasti i Kosovës është mishërim i asaj që bota, bota demokratike mund të arrijë kur të qëndron e bashkuar në mbrojtjen e të drejtave dhe lirive të njeriut.”

Albright iu kundërvu tiranëve, iu kundërvu regjimeve gjenocidale, sepse e kuptonte shumë mirë se pajtimi i tiranëve dhe diktatorëve nuk funksionon kurrë.

“Nuk sjell kurrë paqe të qëndrueshme. Pra padyshim, ajo vlerësohet kaq shumë nga secili person në Kosovë, por unë do të thosha edhe jo vetëm në Kosovë por edhe më gjerë”, deklaroi Osmani.

Për presidenten Osmani, mënyra më e mirë për të nderuar trashëgiminë e Albright është të qëndrosh në anën e atyre që po luftojnë për liritë e tyre sot, për të qëndruar me popullin e Ukrainës./arbresh.info/