Shqipëria është mposhtur me rezultat 1-2 nga Ukraina në ndeshjen e fundit në Ligën e Kombeve.

Protagonist në golin e vetëm të Shqipërisë ishte Myrto Uzuni i cili nxori penalltinë e shënuar nga Nedim Bajrami, shkruan Arbresh.info.

Pas ndeshjes ai ka folur rreth debatit të tij me Bajramin për penalltinë si dhe rrjedhën e ndeshjes.

“Normalisht ndjej keqardhje se e kemi nisur ndeshjen shumë keq. Sot ishte detyrim fitorja dhe normalisht jemi të gjithë të mërzitur për këtë humbje.

Debati te penalltia? Unë jam sulmues dhe gjithmonë dua të shënoj se edhe te Granada i gjuaj dhe shënoj të gjithë penalltitë. Në ato momente fitova penalltinë, jam sulmues dhe doja të zhbllokohesha. A e caktoi trajneri? Mendoj se po, nuk jam shumë i sigurt, nuk dua të gënjej.

Aktivizimi si vetëm? Për mua nuk ka problem se të gjithë e dinë që te Granada luaj si sulmues i dytë, në tre vitet e fundit i dini statistikat. Kur vij në kombëtare trajneri nuk më preferon në majë të sulmit. Mund ta bëj shumë mirë edhe atë. Të luaj për kombin nuk është se lodhem. Ju nuk e dini por dje kam qenë i dëmtuar, kam bërë rezonance e rrezikoja për një dëmtim. Ekipi i Granadës kërkoi të mos rrezikoja, unë mund të refuzoja e mos futesha kur isha 2-0 se rrezikoja karrierën. Por vendosa që të luaj që të tregoj që meritoj një vend për të luajtur”, tha Uzuni për “SuperSport”.

Pas kësaj humbje, Shqipëria mbeti e fundit me shtatë pikë dhe u eliminua në Ligën C në Nations League./Arbresh.info