Tiemoue Bakayoko ka mbetur i zhgënjyer nga deklarata e trajnerit Sarri, me Italianin që u shpreh se nuk do të mbështet tek mesfushori 23 vejcar në këtë sezon të ri të Premier Leagues.

Sipas asaj që shkruan e përditshmja britanike “Daily Mirror” mesfushori francez, i cili u transferua vitin e shkuar nga Monaco për shifrën e 40 milionë paundëve dhe që njëherazi mbetet objektiv i rëndësishëm në merkaton e kuqezinjve të Milanit, kërkonte një shans nga trajneri i ri i Bluve të Londrës, që mesa duket preferon të orientohet drejt lojtarëve të tjerë në organikën e Chelseat.

Mes tyre përmendim Ross Barkley, N’Golo Kante dhe Mateo Kovaçiç, blerjen e re dhe të rëndësishme nga Real Madridi, por mbi të gjithë Jorginhon e Napolit, të cilin Sarri e njeh mjaft mirë si lojtar.

Gjatë konferencës për shtyp Sarri deklaroi se shumë prej lojtarëve të skuadrës do të shkojnë për huazim. Përjashtimi i Bakayokos nga lista e preferencave të Sarrit duket se i hap kështu edhe më shumë dyert Milanit, me Drejtorin e Sportiv Leonardo që e ka pohuar faktin se janë në tratativa me blutë e Londrës për francezin.

Referuar edhe faktit se merkato në Itali përfundon pas një jave, mediat angleze shkruajnë se marrëveshja është gjetur dhe se tashmë operacioni është drejt mbylljes për huazimin e francezit me të drejtë blerjeje pas një viti.