Pas përfundimit të gjysmëstinorit, Trepça ka filluar të bëj disa ndryshime në rosterin e klubit për pjesën më të rëndësishme të sezonit.

Ditë më parë ata njoftuan largimin e Desmond Cambridge Jr, teksa atë e zëvendësoi Tekele Cotton i cili u paraqit mjaft mirë në ndeshjen e tij të parë debutuese ndaj Borës.

Gjatë ditës së sotme, kampionia e Kosovës përmes një njoftimi në rrjetin social Facebook, ka bërë të ditur se i ka dhënë fund marrëveshjes me qendrën Mouhamed Baro.

“Klubi ynë falënderon Mohamed Baron për kontributin, profesionalizmin e tij gjatë kohës që ishte pjesë e ekipit tonë. Me marrëveshje të ndërsjellë kemi vendosur t’i japim fund bashkëpunimit, duke i uruar atij suksese në vazhdimin e karrierës së tij”, shkruhet ndër të tjera në njoftimin e klubit.

Padyshim se Trepça ka menduar për zëvendësimin e tij dhe siç merr Arbresh.info, klubi mitrovicas ka arritur marrëveshje me qendrën amerikane, Michael Myers.

Ai pritet të jetë pasardhësi i Baros. Myers ka një karrierë të pasur ku ka luajtur në ekipe të ndryshme në Evropë si Bordeaux i Francës, Nymburku i Çekisë, Astana në Kazakistan.

Aventura e tij e fundit ka qenë në kampionatin turk saktësisht në skuadrën e Esenler Erokspor.

Ai pritet të zyrtarizohet ditëve në vazhdim nga klubi.

Teksa sezonin pranveror nis në fillimin e muajit janar./Arbresh.info