Sponsori i fanellave të Chelseat, Three i kanë bërë thirrje klubit londinez që të heqë logon e tyre nga fanellat e klubit pas pezullimit të partneritetit.

Chelsea është vendosur nën sanksione si nga BE ashtu edhe nga Britania e Madhe pasi pasuritë e pronarit Roman Abramovich u sekuestruan në lidhje me lidhjet e tij të dyshuara me presidentin rus Vladimir Putin.

Këto sanksione janë detyruar pasi Putin mori vendim për një pushtim të plotë të Ukrainës.

Si rezultat, Chelsea tani po operon nën masa të veçanta që do të thotë se ata nuk mund të shesin bileta ose mallra, të blejnë dhe shesin lojtarë ose të rinovojnë kontratat.

Llogaria e tyre bankare është ngrirë gjithashtu nga Barclays, ndërsa Abramovich është pezulluar si drejtor ndërsa ai kërkon të shesë klubin londinez.

Three, të cilët ranë dakord për një marrëveshje prej 40 milionë funtesh në vit me Chelsean në vitin 2020 pas përfundimit të partneritetit të Bluve me Yokohama Tires, kanë kërkuar që logoja e tyre të hiqet nga të gjitha fanellat, veshjet stërvitore dhe reklamimi në Stamford Bridge.

Megjithatë, kërkesa nuk është përmbushur ende pasi kampionët e Evropës janë ende duke luajtur me logon e ‘3-shit’ në pjesën e përparme dhe në qendër.

Në një deklaratë të re, rrjeti britanik i telefonisë celulare ka thënë se klubi e ka pasur të vështirë të porosisë fanella pa logo dhe po bën thirrje për një zgjidhje të shpejtë.

“Ne e kuptojmë nga diskutimet me Chelsea FC se ka probleme të vazhdueshme me heqjen e logos Three nga bluzat, si rezultat i çështjeve të furnizimit me komplete dhe kufizimeve të licencës”.

“Kemi kërkuar që Chelsea të rikthehet me një zgjidhje për këtë çështje sa më shpejt të jetë e mundur”, thuhet në njoftimin e Three.

Hyundai, prodhuesi japonez i makinave, gjithashtu ka pezulluar marrëveshjen e tyre me Chelsean, por logoja e tyre mbetet në mëngët e bluzave të Chelsea.

Sipas The Athletic, Three nuk janë më të lidhur me Chelsean në asnjë platformë dixhitale, por kufizimet e kanë bërë të vështirë kur bëhet fjalë për asetet fizike.