Sigal Prishtina ka shënuar fitore në ndeshjen e parë të ‘Play-Off’ të Superligës së Kosovës në basketboll.

Kampioni aktual para shikuesve të vetë kanë triumfuar kundër Trepçës me rezultat 89-78.

Bardhekaltërit pjesën e përfunduan me një pikë epërsi, megjithëse ishin super të favorizuar.

Çereku i parë i takoi mysafirëve të cilët një lojë më të sigurt duke e përfunduar 10 minutshin e parë me rezultat 23:22.

Por, prishtinasit shtrënguan radhët e veta dhe me një lojë të bukur të Drilon Hajrizit, i cili realizoi 18 pikë për 20 minuta, përfundoi pjesën e parë me rezultat minimal 47-46.

‘Plisat’ arsyetuan epitetin e favoritit në pjesën e dytë, kur në të dy çerekët triumfuan kundër ‘minatorëve’.

Në çerekun e tretë vendasit ngritën epërsinë në dhjetë pikë dhe këtë periudhë e përfunduan 66:56.

E në periudhën e fundit mysafirët nuk patën fuqi të përcjellin ritmin e vendasve dhe kështu, takimi përfundoi me rezultat 89-78 në dobi të prishtinasve.

Drilon Hajrizi ishte basketbollisti më efikas te ‘Plisat’ me 26 pikë, ndërsa Besnik Azemi u dallua me lojë të mirë te Trepça me 29 pikë.

Seria tash vazhdon në Minatori të Mitrovicës, ku do të zhvillohen dy ndeshjet e radhës. Ekipi që arrin tre fitore së pari, kualifikohet në finale të Play-Off. Në rast se nuk zgjidhet fituesi pas dy ndeshjeve të radhës, atëherë seria në dy ndeshjet e fundit (të katërtën dhe të pestën) bartet në Prishtinë.