Arno Rossini, një trajner zviceran pa asnjë trofe në karrierë, e ka marrë guximin ta godasë ashpër yllin shqiptar të Zvicrës, Xherdan Shaqirin, duke e thënë se askush nuk do ta njohë atë pas 10 vjetëve, sepse, pretendon ai, Shaqiri nuk është futbollist kampion, megjithëse ka shijuar tituj në Gjermani dhe në Angli.

Sulmuesi i Kombëtares së Zvicrës, me prejardhje nga Gjilani i Kosovës, sapo është shpallur kampion i Anglisë, pasi klubi i tij i tanishëm, Liverpool, u kurorëzua me titullin e parë të Premierligës dhe të 19-n në histori të klubit, raporton Gazeta Express.

Shaqiri është paraqitur vetëm në 10 ndeshje në të gjitha garat për të kuqtë këtë sezon, por kryesisht sepse nuk ka qenë në gjendje të luajë shkaku i lëndimit, por pavarësisht e ka fituar edhe një medalje tjetër në koleksionin e tij mbresëlënës.

Në të kaluarën, Shaqiri ishte pjesë e skuadrës së Bayern Munich, e cila shkroi historinë duke e fituar tripletën në sezonin 2012/13. Ai ishte edhe pjesë e Interit në Serie A, por shkurtimisht.

Shaqa, megjithatë, ka hasur në vështirësi për t’u bërë lojtar kyç dhe i pazëvendësueshëm siç mendonin shumë njerëz pasi shpërtheu në sipërfaqen evropiane me Baselin.

Rossini mendon se 28-vjeçari e ka çuar dëm talentin e madh që e kishte.

“Xherdani nuk është kampion”, tha Rossini, i cili i ka udhëhequr skuadrat si FC Sion dhe FC Locarno, por kurrë nuk ka shijuar trofe në karrierën e tij.

“Ne nuk mund të themi se ai ka lënë gjurmë me ekipet me të cilat ka fituar. Ai ishte protagonist në Basel por jo edhe në Bayern e Liverpool”, shtoi ai.

“Të themi se gjatë viteve, ai shpesh i ka shikuar ndeshjet e ekipeve të veta si tifoz, i ulur në vendet më të mira. Dhe miliona euro janë paguar për të.”

Rossini nuk u përmbajt ndaj Shaqirit, njeriut që e ka përfaqësuar Zvicrën në 82 ndeshje, duke e thënë edhe këtë: “Natyrisht, llogaria bankare e Xherdanit po mbushet në mënyrë drastike; nuk e di njerëz do ta mbajnë në mend atë pas 10 vjetëve”.