Amir Rrahmani, mbrojtësi i Kombëtares së Kosovës, shpreson që “Dardanët” të vazhdojnë me paraqitje fantastike edhe në vitin 2019. Kosova nuk di për humbje që nga nëntori i vitit 2017 dhe 25-vjeçari shpreson të vazhdojnë me rezultate pozitive, pak javë para përballjeve me Danimarkën e Bullgarinë.

Në një intervistë për Gazetën Express, Rrahmani ka folur për kualifikimin historik të Dinamo Zagrebit në mesin e 16 skuadrave më të mira në Europa League, për golin që shënoi për ditëlindje si dhe për përballjet e marsit me Danimarkën e Bullgarinë.

Kosova, fillimisht do të përballet me Danimarkën me 21 mars, një ndeshje miqësore që do të zhvillohet në stadiumin “Fadil Vokrri”, pak ditë para se “Dardanët” të nisin aventurën në kualifikimet për “Euro 2020”, po ashtu në stadiumin “Fadil Vokrri”, me Bullgarinë.

Kosova gjendet në Grupin A me Anglinë, Bullgarinë, Malin e Zi dhe Çekinë.

Për shkak të paraqitjeve fantastike në Ligën e Kombeve, ku Kosova fitoi grupin dhe shkroi histori, Rrahmani beson se çdo kundërshtar do ta ketë të vështirë ndaj “Dardanëve”.

Sipas Rrahmanit, miqësorja me Danimarkën, do të jetë një mundësi e mirë që të përgatiten maksimalisht për ta nisur me këmbë të mbarë aventurën në kualifikimet për “Euro 2020”.

“Është ndeshje e rëndësishme për vazhdimësinë dhe përgatitjet për ndeshjet në grupe. Shpresojmë të vazhdojmë me rezultate pozitive”, u shpreh ai për Gazetën Express.

“Jemi Përfaqësuese e denjë dhe çdo kundërshtar do ta ketë të vështirë kundër nesh. Kemi një vit që nuk humbasim dhe shpresojmë ta vazhdojmë kështu”, shtoi Rrahmani.

Rrahmani foli edhe për kualifikimin historik të Dinamo Zagrebit. Për herë të parë, klubi kroat arriti në mesin e 16 skuadrave më të mira në Europa League, pasi eliminoi Viktoria Plzen me rezultat të përgjithshëm 3-1.

Në rundin tjetër, Dinamo do të përballet me Benfican dhe për Rrahmanin, është arritja më e madhe në karrierë.

“Është arritja më e madhe e imja si futbollist edhe e klubit gjithashtu. Asnjëherë nuk ka arrit klubi të kualifikohet në mesin e 16 më të mirëve në Europa League. Jemi të gjithë krenar”, deklaroi Amiri për Express.