Ish-trajneri i Ferizajt, Andrej Panadic ka dhënë një intervistë për mediumin kroat “Vecernji” rreth ndeshjes mes Ballkanit dhe Dinamo Zagrebit që zhvillohet sot (e enjte) në kuadër të rrethit të dytë të fazës së grupe në Ligën e Konferencës.

Panadic ka qenë lojtar i Dinamos, andaj edhe ka analizuar se çfarë e pret ish-ekipin e tij në Prishtinë në ndeshjen që fillon nga ora 18:45 në stadiumin “Fadil Vokrri”.

“Një kundërshtar i rrezikshëm i pret. Epo, të gjithë e dimë që Dinamo është shumë më cilësor, është më me përvojë, sidomos kur bëhet fjalë për ndeshjet evropiane, që luan në një ligë më të fortë se Ballkani, edhe pse liga e Kosovës është shumë e mirë, me tre, katër ekipe të nivelit të lartë”, ka thënë fillimisht Panadic.

“Në tre vitet e fundit, Ballkani në Kosovë është si Dinamo në dhjetë vitet e fundit në vendin tonë (Kroaci). Skuadra është shumë e lëvizshme, luan futboll cilësor, është e përgatitur mirë fizikisht dhe në dy-tre sezonet e fundit kanë bërë një punë të mirë edhe në Evropë dhe kanë rritur cilësinë”.

“Është një ekip modern që ka një trajner shumë të mirë (56-vjeçarin Ilir Daja) nga Shqipëria, i cili ka fituar edhe kampionate atje. Por, njeriu që drejton klubin është veçanërisht i rëndësishëm, presidenti që është i pasur dhe investon shumë në klub”, ka shtuar më tej ai.

Dinamo është pa Petkoviqin, Ristovskin, Shpikiqin, ka probleme edhe Drmiqi – andaj Panadic ka analizuar se si mund të luajë Dinamo ndaj Ballkanit.

“Nuk e di se çfarë kërkon trajneri për këtë ndeshje. Nëse do lartësi dhe forcë, atëherë zgjedhja mund të jetë Kulenoviqi, nëse do lëvizshmëri, atëherë Emreli, varet se si e kanë analizuar blutë kundërshtarin, nuk jam marrë me këtë, kështu që nuk do të ishte e drejtë që mendoj për këtë vetë”, ka shtuar më tej ish-strategu i Ferizajt që aventurën e tij në elitën e futbollit kosovar e ka përshkruar si shumë të bukur. /Telegrafi/