Jose Mourinho e fillon me fitore aventurën në kryeqytetin italian me Romën.

Roma mundi Fiorentinën në mbrëmjen e së dielës në “Olimpico” me rezultat të pastër, 3:1, në një ndeshje e cila përpos katër golave prodhoi edhe dy kartonë të kuq.

Në konferencën për shtyp pas ndeshjes, Mourinho falënderoi tifozët romanistë për atmosferën e krijuar.

“Tifozët e Romës ishin të mrekullueshëm dhe më duhet t’i falënderoj ata. Pasioni i tyre është i pabesueshëm dhe këtë e vërejta kur isha trajner i Interit. Ata po ma bëjnë shumë të vështirë të komunikojë me futbollistët në fushë për shkak se brohorasin shumë. Ky është një problem për mua, por më pëlqen”, u shpreh Mourinho.

Sa i përket ndeshjes, Mourinho nuk ngurroi t’i thurë lëvdata edhe skuadrës kundërshtare dhe trajnerit të saj.

“Ishte një ndeshje e bukur ndaj një kundërshtari që luan futboll të mirë dhe që ka një trajner shumë të mirë. Ne luajtëm më mirë kur ishim të barabartë në fushë, se kur kishim një lojtar më shumë. Mendoj që e merituam fitoren dhe më gëzon mënyra se si skuadra luajti e bashkuar”, theksoi ai.

Për Romën debutoi edhe Tammy Abraham, i cili bëri dy asistime duke iu afruar edhe golit, por shtylla ia mohoi një gjë të tillë.

“Abraham? Jam shumë i kënaqur me paraqitjen e tij. E kishte një javë të vështirë, por kishte mundësi t’i luante 60-70 minuta. Ai mund të luajë së bashku me Shomurodov në sulm, por sonte (mbrëmë) zgjodha një alternativë tjetër për t’u përballur me Fiorentinën”, vazhdoi Mou.

Mourinho në fund u shpreh se i kishin munguar shumë konferencat për shtyp në Itali, pasi që sipas tij, aty diskutohet në hollësi për futbollin, derisa në Angli flitet për problemet jashtë fushës. /Telegrafi/