Google ADS

“Marca”: As Mbappe, as Vinicius – Zhegrova dribluesi më i mirë në Evropë

12:00 | 3 Nëntor 2023
KRG

As Mbappe, as Vinicius, as Rafael Leao – dribleri më i mirë në Evropë mbi 23-vjeç është Edon Zhegrova.

Të paktën kështu thotë ‘indeksi’ i përgatitur bashkërisht nga ‘Wyscout’ dhe ‘CIES Football Observatory’ mes lojtarëve që kanë luajtur të paktën 450 minuta në pesë ligat kryesore evropiane, raporton “Marca”, transmeton KlanKosova.tv

Anësori i majtë i Lillet ka përfunduar me sukses 27 nga 44 driblime që ka tentuar në Ligue 1. Domethënë, ai ka një përqindje suksesi prej 61.36%.

Reprezentuesi kosovar shkëlqeu në fitoren 2-0 të fundjavës së kaluar ndaj Monakos. Nga këpucët e tij erdhën golat e Diakite dhe Cavaleiro.

Ai luajti aq mirë sa edhe ‘Adi’ Hutter, trajneri i Monakos, iu dorëzua ish-lojtarit të Baselit, të nënshkruar nga Lille në janar 2022 në këmbim të 7 milionë eurove: “Zhegrova na dha shumë probleme dhe ndryshoi lojën. 15 minuta para pjesës së parë ai ishte fantastik. Ai ka një të majtë të mrekullueshme. Ai driblon shumë mirë dhe ka veprime shumë të bukura teknike. Edhe duke ditur se çfarë do të bëjë, është e vështirë ta ndjekësh”.

Zhegrova, i cili ka dy gola dhe katër asistime në 14 paraqitje këtë sezon, ka lindur në Gjermani, por ka formësuar driblimin e tij në Kosovë.

“Kam filluar të luaj në Prishtinë kur kam qenë 5-6 vjeç. Njerëzit filluan t’i thonë babait tim: ‘Shikoje djalin tënd, ai ka talent’. Në rrugë je i lirë dhe bën çfarë të duash. Nëse doni të dribloni përballë një kundërshtari, askush nuk do t’ju thotë asgjë. Kjo është e rëndësishme për lojtarët e rinj të talentuar. Kur arrin në një ekip, gjen një trajner që të jep udhëzime gjatë gjithë kohës”, tha ai në një intervistë për “La Voix du Nord”.

“Marca” në fund të shkrimit thotë se driblimi i tij është ‘trashëgimia’ e Ligue 1… por tashmë i kalon kufijtë.

Shpërndaje në rrjete sociale

Lajmet më të lexuara

Të ngjashme

Foto lajm