Manchester City “blindon” Haaland dhe “zhduk” klauzolat, kontratë të re për yllin norvegjez

Manchester City vijon intensivisht punën për kontratën e re të Erling Haaland. Superylli norvegjez ka tejkaluar çdo pritshmëri me kontributin e dhënë tek “The Citizens”. Vetëm në sezonin e parë në Etihad, 23-vjeçari realizoi 52 gola dhe ishte një nga protagonistët kryesorë të fitimit të tripletës në skuadrën e Pep Guardiolës.

Edhe në këtë sezon, Haaland nuk ka ndërmend të ndalet. Në 18 ndeshje të zhvilluara deri më tani, norvegjezi ka gjetur rrugën e rrjetës 17 herë, ndërsa 13 prej golave janë shënuar në Premier League.

Një konfirmim i rëndësishëm për vlerat e Haaland erdhi edhe në garën për “Topin e Artë” 2023, ku sulmuesi u rendit i dyti pas Lionel Messit. Erling Haaland nënshkoi një kontratë 5-vjeçare me Cityn në verën e vitit 2022, me kontratën që përfshin një numër të shumtë klauzolash. Haaland është lidhur me transferime tek Real Madridi dhe Barcelona.

Sipas raportimeve të ndryshme, klauzolat e nënshkruara në kontratën e Haaland nuk bëhen aktive deri në vitin 2025, ndërsa disa u hoqën plotësisht kur Pep Guardiola zgjati kontratën e tij. Tek City janë të gatshëm të zbusin qëndrimin e tyre dhe të diskutojnë një marrëveshje të re që do të rrisë vlerën e klauzolës së lirimit. Real Madridi është konsideruar si favorit për të nënshkruar me Haaland, por planet aktuale të madrilenëve lidhen ende me Kylian Mbappe.

Barcelona, siç u zbulua në shtator, do të jetë gjithashtu në garë për Haaland nga viti 2025 e tutje, kur klubi shpreson të ketë shuar vështirësitë financiare që i kanë pllakosur gjatë dy viteve të fundit.Deri në atë moment, Barça do të jetë në kërkim të një pasardhësi të denjë dhe afatgjatë të Robert Lewandowski.