Nga grumbullimi i shtatorit me Kosovën u largua kokulur, pasi u përjashtua për thyerje të rregullave nga Federata e Futbollit të Kosovës.
Por, kjo nuk e ndaloi, Edon Zhegrovën që të arrijë kulminacionin e tij në karrierë pikërisht gjatë këtij muaji, shkruan Arbresh.info.
Ylli i Lille përgjatë kësaj periudhe kaloi në formë të jashtëzakonshme me klubin e tij, ku së fundmi pati paraqitje mbresëlënëse edhe ndaj Real Madridit në “Champions League”, raporton Arbresh.info.
Ai ishte vendimtar në këtë ndeshje, duke fituar penalltinë, e cila ishte vendimtare për epilogun final të ndeshjes.
Anësori kosovar, u shpall njeriu i ndeshjes në këtë sfidë, për të cilën u shpreh tejet i lumtur.
Përmes një postimi në një ‘Instastory’, 25 vjeçari nga Prishtina shkroi se ka qenë gjithçka një ëndërr.
Pas kësaj paraqitje nuk mungoi edhe reagimi i FFK-së ndonëse i vonuar, por që ishte një ‘shkëndi e mirë’ se raportet Zhegrova-Federatë janë përmirësuar.
Real Madridi nuk ishte ‘viktima’ e vetme e futbollistit kosovar, pasi ai ishte vendimtar edhe në ndeshjet e kampionatit Ligue 1 me skuadrën e tij.
Në katër ndeshjet e fundit në ligën franceze realizoi tre gola dhe një asistim.
Kurse në të gjitha garat deri më tani këtë edicion, ai ka realizuar gjashtë gola dhe një asistim me francezët e Lille.
Formën e tij të mirë ai pritet tashmë ta bart edhe tek kombëtarja e Kosovës, ku është ftuar për dy ndeshjet e tetorit që “Dardanët” do t’i luajnë në kuadër të Ligës së Kombeve.
Ai ka kërkuar falje për veprimet e bëra në shtator dhe tani fokusi i tij 100 për qind është të arrijë rezultatet pozitive me kombëtaren.
Ylli dardan gjatë ditës së sotme pritet t’i bashkohet selektorit Foda dhe bashkë-lojtarëve të tij në stërvitje për këto dy ndeshje.
Por, a do ta tregojë Zhegrova talentin dhe aftësinë e tij që ka në futboll edhe në ndeshjet e Kosovës, mbetet të shihet.
Ndryshe, se Kosova, fillimisht ndeshjen e parë e luan ndaj Lituanisë në udhëtim me datë 12 tetor, teksa pas tri ditësh në tokën dardane pret Qipron.
Kosova bën pjesë në grupin 2 të Ligës C të Kombeve ku pas dy ndeshjeve të para ndodhet në pozitën e dytë me tri pikë, aq sa ka edhe Qipro, mirëpo “Dardanët” janë më të mirë në ndeshjet direkte.
Rumania prinë në këtë grup me gjashtë pikë teksa e fundit është Lituania pa pikë./Arbresh.info /Drilon Halili/
Fryrja e syve, mpirja e qafës, pagjumësia – si t’i trajtoni ...
Thuhet se TikTok thuhet se “është i vetëdijshëm për efektet ...
Zhegrova pas golit dhe fitores me Lituaninë: Krenar që përfa...
Përmbytje në Sahara për herë të parë në gjysmë shekulli
Turistët shijojnë Shqipërinë edhe në tetor, Rama publikon pa...
Gjobë ndaj dy shoferëve që tejkaluan shpejtësinë në Ferizaj