Një grup prej më shumë se 100 ligjvënësish të Bashkimit Evropian po i kërkon organit qeverisës të futbollit evropian të ndalojë Bjellorusinë që të marrë pjesë në Kampionatin Evropian 2024.

Eurodeputetët nga i gjithë spektri politik shkruan në një letër dërguar presidentit të UEFA-s, Alexander Ceferin, se ekipi kombëtar i Bjellorusisë nuk duhet të lejohet të konkurrojë për shkak të historisë së tmerrshme të të drejtave të njeriut në vend, raporton AP.

“Këto nuk janë vetëm vlerat e UEFA-s në lojë, por edhe reputacioni dhe imazhi i UEFA-s brenda shoqërive demokratike dhe komunitetit ndërkombëtar”, thanë ata.

Javën e kaluar, një gjykatë në Bjellorusi dënoi me 15 vjet burg lideren e opozitës në mërgim, Sviatlana Tsikhanouskaya, një përpjekje kjo e qeverisë për të shtypur disidencën.

Presidenti i Bjellorusisë, Aleksandër Lukashenko është një aleat i ngushtë i presidentit rus Vladimir Putin në luftën e tij kundër Ukrainës. Rusia përdori territorin bjellorus për të dërguar trupa në Ukrainë më shumë se një vit më parë në fillim të luftës.

Rusia – e cila tashmë është e përjashtuar nga garat e UEFA-s dhe FIFA-s – ka mbajtur trupa dhe armë në Bjellorusi dhe të dy vendet kanë kryer rregullisht stërvitje të përbashkëta si pjesë e aleancës së tyre ushtarake.

Ky qëndrim e la Lukashenkon edhe më të izoluar në Evropë, ku vendi i tij përballet me sanksione nga Bashkimi Evropian si për rolin e tij në luftë ashtu edhe për shtypjen e opozitës vendase.

UEFA vendosi vitin e kaluar të lejojë Bjellorusinë të hyjë në shortin kualifikues të Euro 2024, pavarësisht një kërkese të qeverisë nga Gjermania, mikpritëse e turneut, për të hequr ekipin sepse vendi është një aleat ushtarak i Rusisë.

“Vetë fakti i pjesëmarrjes në Kampionatin UEFA nga ekipi kombëtar i Bjellorusisë do të përdoret më vonë nga Lukashenko dhe ekipi i tij i propagandës për të provuar se ai është i mirëpritur në komunitetin ndërkombëtar”, shkruanin eurodeputetët në letrën e tyre të mërkurën.

“Kjo do të ishte një ofendim për viktimat e agresionit rus në Ukrainë dhe për të gjithë bjellorusët që u detyruan të largoheshin nga atdheu i tyre si dhe ata që qëndruan në Bjellorusi dhe tani duhet të jetojnë në frikë dhe terror”, shtuan ata.

Bjellorusia do të niste garën e saj kualifikuese kundër Zvicrës më 25 mars në Serbinë neutrale, një vendim që ka shkaktuar pak shqetësim te zviceranët. Lojtarët me rrënjë familjare në Kosovë dhe Shqipëri – përfshirë Granit Xhakën dhe Xherdan Shaqirin – mund të përballen me një pritje armiqësore në qytetin e Novi Sadit.

Në grup janë edhe Izraeli, Rumania, Andorra dhe Kosova.