Carlos Queiroz nuk është më trajner i përfaqësueses së Katarit. Federata e Katarit ka falënderuar trajnerin portugez, duke i uruar suksese në të ardhmen.

“Faleminderit trajnerit Carlos Queiroz për kohën që drejtoi ekipin tonë. I urojmë suksese në karrierën e tij”, lexohet në deklaratë.

Carlos Queiroz, i cili qëndroi më pak se një vit në këtë rol, e drejtoi ekipin e Katarit në 12 ndeshje, nga të cilat fitoi katër, duke përfshirë dy të fundit, kundër Afganistanit dhe Indisë (eliminatore të Botërorit).

Pika kulmore është triumfi ndaj Meksikës, në Kupën e Artë, kompeticion në të cilin Katari u eliminua nga Panamaja, në çerekfinale. Ai gjithashtu fitoi ndeshjen e tij debutuese kundër Xhamajkës.

Përveçse Katarin, trajneri 70-vjeçar ka drejtuar Portugalinë, Emiratet e Bashkuara Arabe, Afrikën e Jugut, Iranin, Kolumbinë dhe Egjiptin.

Në rang klubesh, ka qenë trajner i Sportingut, MetroStars (SHBA), Nagoya Grampus Eight (Japoni) dhe Realit të Madridit, pa harruar përvojën si krahu i djathtë i Alex Fergusonit të Manchester United.

Federata e Katarit ka njoftuar me anë të një shënimi zyrtar në rrjetet sociale se trajneri 61-vjeçar spanjoll, Tintín Márquez, do të jetë pasuesi i Carlos Queiroz./ss