E veja e Kobe Bryant, Vanessa, dhe vajza e tyre Natalia, e dhanë një intervistë emocionuese për ESPN, pasi Kobe Bryant u emërua zyrtarisht anëtar i Hall of Fame. Vanessa tha se do të kishte dashur ta kishte Bryantin aty me familjen për ta festuar këtë arritje, të cilën e quajti si suksesin më të madh në karrierën e tij.

Ashtu siç ishte pritur, Kobe Bryant u bë zyrtarisht anëtar i “Hall of Fame” në basketboll. Ish-basketbollisti legjendar i Los Angeles Lakers, që vdiq në mënyrë tragjike në fillim të këtij viti, u emërua të shtunën në Hall of Fame, ndërsa ceremonia do të mbahet më 29 gusht, transmeton Gazeta Express.

Vanessa e ka cilësuar këtë arritje si suksesin më të madh në historinë e ish-bashkëshortit të saj të ndjerë dhe ka shtuar se kjo gjë ka qenë ngushëllim për familjen gjatë kësaj periudhe të vështirë.

“Është një arritje dhe nder i madh dhe ne jemi shumë krenarë me të. Natyrisht që do të donim ta kishim pasur atë këtu me ne për të festuar, por pa dyshim se kjo është maja e karrierës së tij në NBA”, ka thënë Vanessa.

“Çdo sukses që ai e ka pasur si atlet ka qenë një hap drejt kësaj arritjeje. Ne jemi jashtëzakonisht shumë krenarë me të. Ishte pak ngushëlluese për ne që e dinim se ai me siguri se do të emërohej në klasën e këtij viti të Hall of Fame”.

Vanessa Bryant on Kobe Bryant being inducted into the Basketball Hall of Fame today. “We wish that he was here with us to celebrate but it’s definitely the peak of his NBA career.” pic.twitter.com/cqHr0shYSL

— Arash Markazi (@ArashMarkazi) April 4, 2020

Kobe Bryant vdiq para se të emërohej si njëri ndër kandidatët për klasën e këtij vitit të Hall of Fame. Bryant vdiq më 26 janar së bashku me vajzën e tij 13-vjeçare Giannan, si dhe shtatë persona të tjerë, pasi aeroplani me të cilin po udhëtonin u rrëzua.

Bryant është koshashënuesi më i mirë në histori të Lakers pas 20 sezoneve të luajtura me klubin gjigant. Ai e kishte fituar pesë herë në karrierën titullin e NBA, si dhe dy medalje të arta Olimpike me ekipin kombëtar të SHBA-së.

Legjenda e Lakers u rekrutua në Naismith Memorial Basketball Hall of Fame së bashku me legjendat e NBA, Tim Duncan dhe Kevin Garnett. Bryant, Duncan dhe Garnnet janë tre ndër basketbollistët që e kanë definuar një gjeneratë të basketbollit në NBA dhe për këtë arsye shumë tifozë e kanë vlerësuar klasën e këtij viti në Hall of Fame si më mbresëlënësen.

Përveç tyre, në Hall of Fame u rekrutuan edhe katër trajnerë – Rudy Tomjanovich, Eddie Sutton, Kim Mulkey dhe Barbara Stevens, 10-herë kampionia e WNBA Tamika Catchings, si dhe një ekzekutiv i FIBA-s, Patrick Baumann.