Elita e futbollit kosovar është rikthyer të premten me ndeshjen e parë që është zhvilluar mes Llapit dhe Dukagjinit ku fitore realizuan llapjanët 3:1.

Ndërkohë ditën e sotme në program janë për tu zhvilluar dy ndeshje të tjera, të cilat do të startojnë nga ora 16:00.

Njëra nga skuadrat pretendente për titull, Drita do të jetë nikoqir i Flamurtarit të Prishtinës.

Bardhekaltërtit synojnë që të marrin maksimumin e pikëve nga kjo përballje në mënyrë që të dalin në pozitën e parë në tabelë, ku Ballkani ndodhet momentalisht me një pikë më shumë.

Në anën tjetër Flamurtari udhëton drejt Gjilanit me të vetmin qëllim që mos të mposhtet, pasi çdo pikë për kryeqytetasit ka vlerë të madhe në luftën për mbijetesë.

Ndeshja tjetër e ditës së sotme do të zhvillohet në Drenas mes Feronikelit dhe Vushtrrisë.

Kampioni aktual i Kosovës momentalisht zë pozitën e gjashtë në tabelë me 34 pikë, 10 më pak se lideri Ballkani.

Ekipi i drejtuar nga Afrim Tovërlani me një fitore eventuale ditën e sotme do të shkëputej nga skuadrat që luftojnë për mbijetesë, por edhe do t’i rrite shpresat për një vend që i dërgon në Ligën e Evropës, gjithmonë duke shpresuar në gabimin e skuadrave që janë sipër tyre.

Të dyja ndeshjet fillojnë nga ora 16:00, ndërsa si në Drenas ashtu edhe në Gjilan do të luhet pa tifozë. /Telegrafi/