Sulmuesi i Brazilit dhe Tottenham Hotspur, Richarlison foli për luftën e tij me depresionin pas Kupës së Botës në Katar. 26-vjeçari pranoi se kishte përjetuar mendime të errëta dhe ndjeu se do të hiqte dorë pas turneut të vitit 2022.

Richarlison ka qenë njëri nga shumë lojtarët që është përballur me depresionin dhe mendimet e këqija, për të cilat ka vendosur të flasë në një intervistë.

“Para se të shkoja në stërvitje, doja të shkoja në shtëpi, doja të kthehesha në dhomën time sepse … nuk e di se çfarë po më kalonte në kokë. Madje shkova dhe i thashë babait tim se do të dorëzohesha”, ka thënë fillimisht Richarlison për ESPN.

“Është disi e trishtueshme të flasësh kështu, e di? Ajo që kam kaluar pas Kupës së Botës, duke zbuluar gjëra këtu në shtëpi nga njerëzit që kishin jetuar me mua për më shumë se shtatë vjet… Është çmenduri”.

“Të shkosh te babai im, i cili ishte djali që ndoqi ëndrrën time me mua, dhe të thuash: “Babi, dua të heq dorë”, është një çmenduri”.

“Sapo kisha luajtur në një Kupë Bote, o njeri, në kulmin tim. Po arrija kufirin tim, e dini? Nuk e di, nuk do të flas për të vrarë veten, por unë isha në depresion atje dhe doja të hiqja dorë”.

“Edhe unë, që dukesha se isha i fortë mendërisht. Pas Kupës së Botës, mu duk sikur gjithçka u shkatërrua”.

“Mendoj se terapisti, desha apo jo, më shpëtoi, më shpëtoi jetën. Mendoja vetëm broçkulla… Edhe në Google kërkoja vetëm broçkulla, doja të shihja vetëm broçkulla për vdekjen”.

“Sot mund të them, kërkoni një psikolog, nëse keni nevojë për një psikolog, kërkoni një sepse është mirë që ju të hapeni kështu, që po flisni me personin”.

“Sot një [psikolog] erdhi për të më falënderuar që e çova këtë në botën e futbollit, në gjithë botën, edhe jashtë fushës sepse është shumë e rëndësishme dhe, duam apo jo, shpëton jetë”, përfundoi ylli brazilian. /Telegrafi/