Federata e Futbollit e Kosovës dhe sponsori i Superligës, Albi Mall vazhdojnë ndarjen e çmimit “Ylli i Javës”.

Ky çmim për javën e 10-të në Albi Mall Superligë i ka takuar futbollistit të Ballkanit, Almir Kryeziu, shkruan Arbresh.info.

Almir Kryeziu arriti të shënojë dy gola në ndeshjen që Ballkani e fitojë me rezultat 4-1, ndaj Lirisë së Prizrenit.

Ai u shpreh i lumtur pasi fitoi çmimin e më të mirë javës.

“Jam mirënjohës ndaj Federatës së Futbollit të Kosovës për vlerësimin e tyre, po ashtu falënderoj edhe bashkëlojtarët e mi dhe shtabin teknik të Ballkanit për përkushtimin dhe përkrahjen gjatë ndeshjes së fundit. Ishte një përballje e veçantë dhe dëshiroj të theksoj se ishte një sfidë e vështirë për mua dhe skuadrën time, sidomos duke qenë në disavantazh kundër skuadrës së fortë të Lirisë.

Gjithashtu, është e rëndësishme të përmend se kjo ndeshje kishte një ndjenjë të veçantë për mua. Në fakt, kjo ishte emocionale për mua, pasi kam kaluar shumë vite në shkollën e futbollit të Lirisë, ku jam rritur duke kaluar përmes të gjitha grupmoshave”, ka thënë Kryeziu për faqen zyrtare të FFK-së, tha Kryeziu.

Ai ka folur edhe për sfidën e radhës së portokallezinjve në UEFA Conference League kundër Astanës.

“Ne jemi të gatshëm për këtë sfidë. Do të jemi të përgatitur dhe do të japim më të mirën tonë në fushë. Kemi një skuadër të fortë dhe besoj se mundemi të arrijmë suksese në këtë kompeticion”, ka shtuar Kryeziu.

Kujtojmë se ndeshja e ardhshme e Ballkanit është ndaj Astanës të enjten me fillim nga ora 18:45, më kuadër të Conference Leauge./Arbresh.info/