Shtatë vende prodhojnë mbi 99.7% të energjisë elektrike nga burime të rinovueshme, ku mes tyre është edhe Shqipëria. Vendet e tjera janë Butani, Nepali, Paraguai, Islanda, Etiopia dhe Republika Demokratike e Kongos, sipas “The Buisness Magntes”.

Për më tepër, mbi 40 vende të tjera, përfshirë Gjermaninë dhe Portugalinë, prodhojnë të paktën gjysmën e energjisë elektrike nga burimet e rinovueshme.

Energjia e erës pa një rritje të konsiderueshme në vitin 2023, me 116 gigavat kapacitet të ri të instaluar globalisht, të udhëhequr nga Kina, SHBA, Brazili dhe Gjermania.

Energjia diellore është gjithashtu në rritje, e parashikuar të bëhet burimi kryesor i energjisë në botë deri në vitin 2050. Megjithatë, ekspertët paralajmërojnë se rritja vjetore e burimeve të rinovueshme duhet të trefishohet deri në vitin 2030 për të përmbushur objektivat klimatike.

Kina kryesoi për instalimin e erës në det dhe në tokë, e ndjekur nga SHBA, Brazili dhe Gjermania. Falë rritjes së fortë në Holandë, Evropa gjithashtu pati një vit rekord në 2023 me 3.8 gigavat kapacitet të ri të erës në det të hapur.

Raporti vëren se, ndërsa rritja e energjisë së erës është shumë e përqendruar në disa vende të mëdha, disa rajone dhe kombe të tjera panë rritje rekord. Afrika dhe Lindja e Mesme instaluan gati 1 gigavat kapacitet të energjisë së erës në vitin 2023, pothuajse trefishi i asaj të një viti më parë.

Autorët e tij thonë se bota po “lëviz në drejtimin e duhur në luftimin e ndryshimeve klimatike”. Autorët paralajmërojnë, megjithatë, se rritja vjetore duhet të jetë së paku 320 gigavat deri në vitin 2030 për të përmbushur premtimin COP28 për trefishimin e energjisë së rinovueshme deri në fund të dekadës.