Për herë të parë në histori Shqipëria do të marrë pjesë në këtë vit, në lojërave islamike. Si shtet anëtar i Konferencës Islamike që nga viti 1992 vendi ynë ka marrë ftesë në çdo vit që janë organizuar këto lojëra, por vetëm në 2017-n Komiteti Olimpik Kombëtarë  Shqiptar ka vendosur të marrë pjesë.

“Edhe ne si Komiteti Olimpik kemi marrë miratimin nga Ministria e Jashtme dhe nga Ministria e Sporti. Pa e paragjykuar do të marrim pjesë e në këto aktivitete duke dërguar sportistët tanë në mënyrë që t’i shërbejë bashkimit midis popujve midis besimeve pavarësisht se sporti është jashtë politikave fetare”, tha Stavri Bello sekretar i përgjithshëm i KOKSH.

Edhe pse mbajnë emrin e Lojërave të Solidaritetit Islamik, në këtë aktivitet nuk do të ketë kritere fetare në pjesëmarrje.

“Nuk duhet keqinterpretuar me fjalën Islam. Nuk ka asnjë lloj kriteri mbi besimin fetar është e hapur të marrin pjesë të gjithë sportistët që dëshirojnë dhe pretendojnë për të arritur rezultate pozitive. Ne deri tani mendojmë të marrim pjesë në 7 disiplina të ndryshme sportive me një delegacion modest sepse kaq na e lejojnë mundësitë financiare, por do të çojmë sportistët tanë më të mirë”, shprehet Stavri Bello.

Për herë të parë Lojërat e Solidaritetit Islamik janë zhvilluar në vitin 2005 në Arabinë Saudite, pas 5 vitesh edicioni i dytë që ishte parashikuar të zhvillohej në Teheran u anulua për shkak të konfliktit mes shteteve, ndërkohë që edicioni i fundit është zhvilluar në vitin 2013 në Palembang të Indonezisë.

Në këtë vit këto lojëra do të organizohen në Baku të Azejrbaxhanit nga 12 deri në 22 maj.