Platforma e mediave sociale, TikTok ka reaguar pas njoftimit të qeverisë së Shqipërisë për të ndaluar aplikacionin për një vit.

TikTok ka kërkuar sqarime urgjente nga qeveria shqiptare në lidhje me ndalimin e propozuar.

\Kompania i tha BBC-së se nuk kishte prova që viktima apo sulmuesi i 14-vjeçarit të kishin pasur llogari në TikTok, megjithëse ngjarja që çoi në vrasjen e tij kishte lidhje me një përplasje në rrjetet sociale.

Kryeministri i Shqipërisë, Edi Rama, ka njoftuar se TikTok do të mbyllet për një vit, vendimi pritet të hyjë në fuqi nga janari.

Ky vendim i Ramës vjen pas vrasjes tragjike të një djali 14-vjeçar në Tiranë. Ngjarja, e cila ndodhi muajin e kaluar, raportohet të ketë pasur lidhje me një përplasje në rrjetet sociale, duke shkaktuar shqetësime në të gjithë vendin për ndikimin e platformave si TikTok te të rinjtë.

“Ne do ta mbyllim për një vit dhe do të fillojmë të hapim programe që do t’i shërbejnë edukimit të studentëve dhe do të ndihmojnë prindërit të ndjekin rrugëtimin e fëmijëve të tyre”, tha Rama.

TikTok është tashmë i ndaluar në Indi, i cili ishte një nga tregjet më të mëdha të aplikacionit përpara se të shpallej i jashtëligjshëm në qershor 2020. Është gjithashtu i bllokuar në Iran, Nepal, Afganistan dhe Somali.

TikTok po lufton gjithashtu kundër një ligji të miratuar nga Kongresi Amerikan, i cili do ta ndalojë aplikacionin nga 19 janari, nëse nuk shitet nga ByteDance – kompania e saj mëmë kineze. /Telegrafi/