Policia e Lushnjës ka mbyllur hetimet, lidhur me aksidentin tragjik ku dy persona, babë e bir humbën jetën, ndërsa 7 të tjerë u plagosën. Deri tani janë marrë në pyetje të dëmtuarit, të cilët janë shtruar në spitalin e Lushnjës, ndërsa deputeti, Bujar Cela, si dhe të dëmtuarit Saimir Korreshi dhe Sokol Lumi, nuk jane pyetur ende, për shkak të gjendjes së tyre shëndetësore, e cila paraqitet e rënduar.

Sokol Lumi nuk ka dalë ende nga gjendja e komës. Ai ishte klient i rastësishëm në pikën e produkteve ushqimore me shumicë, kur u godit në koke nga një hekur si pasojë e shpërthimit, ndërsa i plagosuri tjetër, Saimir Korreshi, edhe ai ishte në biznesin e tij që ndodhet pranë kapanonit në ndërtim.

Bujar Çela do të merret në pyetje nga prokurorë të posaçëm për shkak të funksionit të tij si deputet.

Prokurorja e çështjes është, Anila Gaxhari. Sipas burimeve, pistat e hetimit janë disa, si dhënia e lejes së ndërtimit, e cila i është dhënë nga bashkia e Lushnjës deputetit Çela në shtator të 2023, kriteret e zbatimit të saj, a kanë qenë kushtet e sigurimit teknik të zbatuara sipas ligjit etj.

Dyshohet se shpërthimi ka ndodhur nga plasja e njërës prej bombolave e mbushur me material lehtësisht shpërthyes, si pasojë e nxehtësisë së shkaktuar prej saldimit dhe jo nga kabllot elektrikë.

Ndërkohë, diten e diel, një grup nga emergjencat civile të bashkisë Lushnjë, kanë bërë verifikimin e dëmeve, kryesisht të banesave private të dëmtuara si pasojë e shpërthimit.

Ditën e hënë këshilli bashkiak i qytetit ka marre vendim ti japë 500 mije lekë familjes Hoxha nga fshati Stan Karbunare, të cilët ndërruan jetë si pasojë e aksidentit./rtsh.al/