Hyrja nga Shqipëria në Itali dhe i personave që kanë udhëtuar gjatë 14 ditëve të fundit në Shqipëri lejohet vetëm për motive pune, shëndeti, studimi, urgjencë absolute, apo rikthim në banesën e rezidencës.

Lajmi konfirmohet për RTV Ora e Ora News nga ministria italiane e Shëndetësisë, e cila bën me dije se Shqipëria ka dalë nga lista e vendeve D, të Ministrisë duke u renditur në zonën e kuqe të nivelit E.

Sipas listës së Ministrisë së Shëndetësisë Italiane Shqipëria nuk është më në pikat 3 (që korrespondon me nivelin C të sigurisë) dhe 4 ( që i përket nivelit D), gjë që e rendit vendin tonë automatikisht në pikën 5 të këtij vendimi, apo në nivelin E të sigurisë pandemike.

Ndërkaq mësohet se ky vendim hyn në fuqi nga dita e martë më 26 tetor dhe do të zgjasë deri në 15 dhjetor këtij viti masat anti Covid për hyrjen në territorin italian nga vende jo anëtare të Bashkimit Europian.

Për Shqipërinë do të vazhdojnë të jenë të njëjta kushte që po aplikohen deri më sot.

Çdo qytetarë shqiptar në territorin italian është i lirë të hyj duke prezantuar tamponin molekular negativ brenda 72 orëve para nisjes nga Shqipëria ose tamponin e shpejte në 48 orët e fundit para udhëtimit; si dhe formularin PLF në formën dixhitale ose të stampuar.

Në rast të mungesës se tyre, ata duhet t’u nënshtrohen një autoizolimi me besim nën mbikëqyrjen shëndetësore për 5 ditë duke informuar qendrën mjekësore më të afërt pranë banesës ku do të qëndroj në Itali.

Për shtetasit kosovarë që hyjnë në territorin italian, kërkohet certifikata shëndetësore që vërteton vaksinimin nga një vaksinë anti covid e njohur nga EMA, agjencia europiane e barnave, formulari PLF e në rast të mungesës së tyre duhet të kryejnë tamponin e shpejtë në 48 orët e fundit ose atë molekular në 72 orët para nisjes së bashku me autoizolimin 5 ditor.