Sipas të dhënave të sigurara nga Drejtoria e Përgjithshme e Doganave, volumi i mallrave tona drejt Kosovës është rritur me 33 mijë ton, ndërsa në vlerë monetare janë 7 milionë Dollarë më shumë eksporte për Nëntorin e këtij viti krahasuar me të njëjtin muaj në 2017-n.  Nikolin Jaka, kryetar i Dhomës së Tregtisë,  thotë se eksportet e miellit dhe materialeve të ndërtimit po njohin rritjen më të madhe.

Megjithatë, bizneset kërkojnë që të dyja qeveritë të bashkëpunojnë për të hequr barrierat tregtare. Jaka sqaron se tarifa e skanimit në dogana, ajo e terminalit dhe taksa e kalimit për kamionët  në rrugën Durrës – Kukës nuk i shërbejnë rritjes së shkëmbimeve tregtare mes dy vendeve.

Bizneset shqiptare nuk e shohin si një masë të përkohshme vendosjen e taksës doganore 100% për produktet serbe e boshnjake nga ana e Prishtinës zyrtare. Nikolin Jaka thotë se ka marrë premtimin se taksa do të jetë afatgjatë si nga Kryeministri Rramush Haradinaj, ashtu edhe nga kreu i Kuvendit të Kosovës Kadri Veseli. Por kryetari i Dhomës së Tregtisë bën thirrje që bizneset shqiptare të lëvizin sa më parë për të zëvendësuar në tregun kosovar boshllëkun që po lënë mallrat serbe.
Tv Klan