Kryeministri i Shqipërisë, Edi Rama ka reaguar sot pas protestës të organizuar dje në mbështetje të kryetarit të zgjedhur të Bashkisë së Himarës, Fredi Beleri, i cili ndodhe në paraburgim prej disa muajsh i akuzuar për blerje votash.

Rama ka bërë thirrje për të respektuar ligjin duke shtuar se ai nuk ka dëgjuar një rast tjetër të ngjashëm, kur të zgjedhurit e një shteti demokratik organizojnë protestë në një shtet tjetër demokratik, kundër autoriteteve të këtij shteti.

“Jo vetëm kaq, po ku ata shfaqen si protestues kundër vendimeve të gjykatave përkatëse të shtetit në të cilin protestojnë, duke e absolutizuar përkatësinë etnike të subjektit të protestës mbi çdo normë juridike, standard ligjor e logjikë demokratike. Kjo është një nga ato situata tipike, kur shprehja “Jam pa fjalë!” është e para që të vjen në mend dhe do të doje të ndaleshe me aq. Por kjo është edhe një nga ato situata tipike, kur në Ballkan merr jetë ajo shprehja “Digjet jorgani për një plesht!” prandaj edhe duhet folur e bërë çmos, që ky të mos jetë kurrësesi rasti”, ka shkruar Rama.

Ai ka shtuar se politizimi i kësaj çështjeje është i denjë për marrëdhëniet shtetërore në Ballkanin e vjetër dhe jo realitetit demokratik evropian.

“Për mua, ky politizim i një çështjeje të drejtësisë shqiptare, deri në pikën që të organizohet një protestë këtu në Shqipëri nga autoritete të zgjedhura në Greqi, ndër të cilët as më shumë e as më pak, po edhe kryebashkiakët e dy qyteteve më të mëdha të Greqisë, mund t’i shkonte skenarit të një filmi sarkastik për marrëdhëniet ndërshtetërore në një Ballkan të denjë për stereotipin e vet të vjetër të përplasjeve “kush jam unë e kush je ti!”, po jo realitetit demokratik të fqinjësisë europiane, mes një vendi anëtar të BE-së dhe një vendi që aktualisht negocion anëtarësimin në BE”, tha Rama./Arbresh.info/

Reagimi i plotë: