Pushtimi i Ukrainës nga Rusia mund të ndikonte në politikat e brendshme të disa vendeve të rajonit, duke përfshirë edhe proceset politike mes Kosovës dhe Serbisë, u shpreh ministri i Mbrojtjes së Shqipërisë, Niko Peleshi.

Në një interviste për Euronews Albania, Peleshi është shprehur se vende si Serbia apo Bosnjë-Hercegovina mund të ndikoheshin në politikat e tyre të brendshme në rast të një pushtimi të mundshëm rus ndaj Ukrainës.

Ai përmendi çështje të nxehta dhe ende të hapura në Ballkan siç është veriu i Kosovës, dialogu Kosovë-Serbi të cilat mund të ndikohen nëse ndodh një sulm ushtarak.

“Nuk dua ta mendoj si përplasje të ushtrive dhe pozicionim të shteteve por e kam fjalën për përshkallëzim të situatës, ndikim të situatës së politikës së brendshme në vende si Serbia që janë të ndikuara nga Rusia”, Peleshi ka thënë.

Ministri Mbrojtjes ka shtuar se Shqipëria i qëndron në krah Kosovës në rast të një konflikti.

“Po flas për konflikte politike, për prishje të proceseve politike. Kemi dialogun në Kosovë, Ballkanin e hapur. Por të gjitha këto në ndikimin e një konflikti të tillë nuk mund të kenë progres por vetëm regres”, Peleshi nënvijëzoi.