Pas miratimit të ndryshimeve kushtetuese nga Komisioni i Ligjeve, zv.kryetari i Grupit të CDU-CSU në Bungestag, Johann David Wadephul ka reaguar duke theksuar që reforma zgjedhore duhet të miratohet nga Parlamenti pa ndryshime, ashtu siç përcaktohet në marrëveshjen e 14 janarit 2020.

Nëse marrëveshja e 5 qershorit nuk miratohet siç është dakordësuar, Wadephul paralajmëroi bllokimin e konferencës së parë ndërqeveritare dhe procesin e integrimit. Sipas tij, ndryshimi kushtetues do të rrezikonte reformën zgjedhore dhe do ta asgjësonte atë.

“Në praktikë, kjo do të thoshte, se Parlamenti shqiptar do të bënte të pavlefshme reformën zgjedhore të arritur me marrëveshjen e 5 qershorit. Kjo do ta vendoste parlamentin shqiptar dhe shumicën qeverisëse, përfshirë Kryeministrin, kundër vendimit të të gjithë krerëve të shteteve dhe qeverive të Bashkimit Europian, të marrë në mars të këtij viti, dhe do të vinte në veçanti në pikëpyetje perspektivën e Shqipërisë në Bashimin Europian. Për më tepër, një qasje e tillë do të ishte një shkelje e jashtëzakonshme e besimit ndaj BE-së, OSBE-së dhe aktorëve të tjerë ndërkombëtarë që kanë dhënë një kontribut të rëndësishëm për arritjen e një reforme të mirë zgjedhore.”

Wadephul i bën thirrje deputetëve në Parlamentin shqiptar që të miratojnë reformën zgjedhore siç përcaktohet në marrëveshjen e 5 qershorit.

“Bëni një hap të madh drejt forcimit të demokracisë në vendin tuaj dhe miratoni reformën zgjedhore siç përcaktohet në marrëveshjen e 5 qershorit. Dhe hiqni dorë nga ndryshimet e planifikuara kushtetuese që do ta shkatërronin reformën zgjedhore. Vetëm atëherë ju do të keni akoma mbështetjen e fortë të Bundestagut gjerman. Prandaj: mos vini në pikëpyetje perspektivën e BE-së për vendin tuaj! Populli shqiptar nuk e meriton këtë!”./vizionplus