Policia e Shtetit ka publikuar sot pamjet e operacioni policor të Forcave të Posaçme “Shqiponja” në qytetin bregdetarë të Vlorës.

Në përmbyllje të operacionit, policia ka njoftuar arrestimin në flagrancë të tre personave, njëri prej tyre i shpallur në kërkim për vrasje me dashje, të mbetur në tentativë.

I kërkuari dhe drejtuesi i mjetit janë kapur në flagrancë, secili me armë zjarri pistoletë me vete, ka shtuar policia.

Policia ka sekuestruar 2 armë zjarri pistoletë dhe municion luftarak.

Sipas njoftimit, forcat “Shqiponja ka “bërë arrestimin në flagrancë të shtetasve: K. D., 50 vjeç, banues në lagjen “24 Maji”, për veprën penale “Mbajtja pa leje dhe prodhimi i armëve, armëve shpërthyese dhe i municionit”, pasi gjatë kontrollit iu gjet një armë zjarri pistoletë; A. K., 21 vjeç, banues në lagjen “24 Maji”, Vlorë, pasi gjatë kontrollit fizik, iu gjet në brez, një armë zjarri pistoletë. Nga veprimet hetimore rezultoi se ky shtetas ishte shpallur në kërkim për veprat penale “Vrasja në rrethana cilësuese” kryer në bashkëpunim, mbetur në tentativë dhe “Mbajtja pa leje dhe prodhimi i armëve, armëve shpërthyese dhe i municionit” në lidhje me ngjarjen e ndodhur në datën 04.08.2019, në lagjen “1 Maji”, Vlorë”.

Policia ka arrestuar edhe shtetasin Sh. L., 37 vjeç, banues në lagjen “24 Maji”, i cili dyshohet si përkrahës i personit në kërkim.

Materialet procedurale i kaluan Prokurorisë pranë Gjykatës së Shkallës së Parë Vlorë, për veprime të mëtejshme./arbresh.info/