Presidenti i Shqipërisë, Ilir Meta, ka reaguar pas ngjarjes së natës së kaluar në Velipojë ku humbjen jetën 4 persona dhe u plagosën dy të tjerë.

Ai ka thënë se ngjarje është tragjike dhe kërkon hetim të plotë.

Meta përmes një postimi në Facebook ka thënë se ngjarje si kjo në ambientet publike në kulmin e sezonës përveç që rrezikojnë jetën e qytetarëve dëmtojnë edhe imazhin e Shqipërisë tek turistët, raporton arbresh.info.

Meta ka shkruar se plazhet dhe qendrat e qyteteve të Shqipërisë nuk  e meritojnë t’i ngjajnë shesh-betejave të “Wild West”

Postimi i plotë i tij:

Përplasja me armë zjarri në Velipojë, me 4 viktima dhe 2 të plagosur, është një tjetër ngjarje tronditëse, që kërkon hetim të plotë të rrethanave dhe shkaqeve.

Prej kohësh i kam bërë thirrje, në mënyrë të vazhduar, Policisë së Shtetit dhe strukturave të tjera të sigurisë dhe të zbatimit të ligjit, të angazhohen maksimalisht për të mbajtur nën mbikqyrje territorin e vendit, që paraqet rrezik të shtuar për konflikte, me qëllim parandalimin në kohë të këtyre veprave të rënda penale.

Konfliktet me armë zjarri, që konsumohen në ambiente publike dhe në kulmin e sezonit turistik, vënë në rrezik jetën dhe shëndetin e dhjetëra qytetarëve, por nga ana tjetër dëmtojnë seriozisht imazhin e Shqipërisë tek turistët vendas dhe të huaj.

Plazhet dhe qendrat e qyteteve tona nuk e meritojnë t’i ngjajnë shesh-betejave të “Wild West”.

Ndaj në këtë situatë, që duket se ka dalë jashtë kontrollit dhe që çdo ditë prodhon fatkeqësisht viktima, secili autoritet i lartë shtetëror duhet të mbajë përgjegjësitë e tij të detyrës dhe të heqë dorë nga propaganda cinike, që nuk mund të mbulojë të vërtetat, që i shohim të gjithë.

Rendi dhe siguria publike është dëmtuar seriozisht dhe kërkojnë masa të reja efektive për garantimin e tyre, me qëllim mbrojtjen e jetës, shëndetit dhe të pronave të qytetarëve.