Nëse të hënën zyrtarizohen ndryshimet në Qeveri, ato ndoshta do të jenë më të rëndësishmet, por jo të parat të bëra nga Kryeministri Rama.

I fundit ishte largimi i Ylli Manjanit, ndërsa për të gjetur të parin duhet të kthehemi në 2014. Në gusht të atij viti, Ilirjan Celibashi dha dorëheqjen për arsye personale nga drejtimi i Ministrisë së Shtetit për Marrëdhëniet me Parlamentin, për t’i lënë vendin në këtë post Ermonela Felajt.

Pas Celibashit, ishte radha e Erion Veliajt. Ai u dorëhoq nga posti i ministrit të Mirëqenies Sociale për të garuar në zgjedhjet vendore për Bashkinë e Tiranës, post që e mban sot pas fitores ndaj rivalit të opozitës, Halim Kosova.

Për zëvendësimin e Veliajt qarkulluan disa emra, por në fund kjo ministri iu besua nga Kryeministri Edi Rama, Blendi Klosit, raporton Top Channel

Një vit pas këtij ndryshimi, ndodh një tjetër lëvizje, këtë herë në radhën e ministrave të aleatit kryesor të socialistëve në koalicion, LSI-së. Nasip Naço largohet nga posti i ministrit të Drejtësisë dhe i lë vendin Ylli Manjanit.

Disa muaj pas këtij ndryshimi, mbërrin një tjetër. Në shkurt të 2016 ai që largohet është Shkëlqim Cani. Ai pasohet në postin e ministrit të Financave nga Arben Ahmetaj dhe vendi i lënë bosh prej këtij të fundit në krye të Ministrisë së Ekonomisë dhe Turizmit plotësohet nga Milva Ekonomi.

Në shtator të 2016 ai që largohet është Edmond Haxhinasto. Ministri i LSI-së në krye të Transporteve zëvendësohet nga Sokol Dervishaj, ndërsa 2017 nisi me një tjetër ndryshim.

Në fund të janarit, në ndryshim nga largimet e tjera, Ylli Manjani shkarkohet nga Kryeministri Edi Rama. Vendimi u mor pas një takimi mes kreut të ekzekutivit dhe Ilir Metës dhe në fund u ra dakort që Manjani të zëvendësohet nga Petrit Vasili.

Në total, në 3 vite e gjysmë janë gjashtë ndryshime në qeverinë Rama të ndara në mënyrë të barabartë mes dy aleatëve kryesorë qeverisës, tre nga ministrat e propozuar nga socialistët dhe tre nga ministrat e propozuar nga LSI.