Media italiane i ka kushtuar një shkrim Shqipërisë dhe rivierës së saj duke e konsideruar si një destinacion të përsosur për të kaluar pushimet verore gjatë gushtit.

“Saranda, një nga perlat e bregdetit jugor të Shqipërisë, me klimën e saj mesdhetare, ujërat kristal të detit Jon dhe pasurinë e vendeve historike, ofron një eksperiencë të paharrueshme për vizitorët”, shkruan media italiane “Gaeta.it”.

Plazhet dhe deti

Plazhi i Ksamilit: Pak kilometra larg Sarandës, Ksamili është i famshëm për ujërat e tij bruz dhe ishujt piktoreskë. Plazhet me rërë dhe limanet e fshehura ofrojnë një mjedis ideal për relaksim dhe not. Në gusht, temperaturat e larta e bëjnë këtë vend të përsosur për të shijuar detin.

Plazhi i Pasqyrave: Ky plazh njihet për ujërat e tij të pastër dhe qetësinë. Quhet i tillë për shkal të pastërtisë së ujit, ai është ideal për ata që kërkojnë një cep parajse ku nuk ka shumë njerëz.

Vende Historike dhe Kulturore

Butrinti: Ky vend arkeologjik, një vend i trashëgimisë së UNESCO-s, është i domosdoshëm për këdo që viziton Sarandën. Butrinti ofron një dritare në historinë e lashtë me rrënojat e tij të ruajtura mirë që datojnë në periudhat greke, romake, bizantine dhe veneciane.

Kalaja e Lëkurësit: E vendosur në një kodër me pamje nga Saranda, Kalaja e Lëkurësit ofron pamje spektakolare panoramike të qytetit dhe detit. E ndërtuar në shekullin e 16-të nga turqit osmanë, është një vend i mrekullueshëm për të parë perëndimin e diellit.

Natyra dhe aventura

Syri i Kaltër: Ky burim natyror, që ndodhet rreth 30 minuta me makinë nga Saranda, është një fenomen natyror mbresëlënës. Ujërat blu intensive burojnë nga një thellësi e panjohur, duke krijuar një efekt vizual magjepsës. Është një vend i mrekullueshëm për një shëtitje ditore dhe një zhytje freskuese në ujërat e ftohtë.

Parku Kombëtar i Llogarasë: Rreth një orë me makinë në veri, Parku Kombëtar i Llogarasë ofron shtigje ecjeje të rrethuara nga natyra dhe pamje të lë pa frymë. Në gusht, temperaturat e ftohta të malësive ofrojnë një strehë nga nxehtësia e bregdetit.

Jeta e natës dhe Gastronomia

Bregdeti i Sarandës: Shëtitorja buzë detit të Sarandës është zemra e jetës së natës së qytetit. Në gusht, restorantet, baret dhe kafenetë përgjatë bregdetit janë plot me turistë dhe vendas që shijojnë mbrëmjet e verës. Shijoni kuzhinën lokale, e cila përfshin pjata me peshk të freskët dhe specialitete mesdhetare.

Taverna Limani: Ky restorant është i famshëm për kuzhinën e tij tradicionale shqiptare dhe pamjet spektakolare të detit. Është vendi i përsosur për një darkë romantike ose një mbrëmje me miqtë.

Saranda në gusht ofron një kombinim perfekt të bukurisë natyrore, historisë dhe argëtimit. Pavarësisht nëse jeni adhurues i plazhit, adhurues i historisë apo aventurier, ky qytet shqiptar ka diçka për të ofruar për të gjithë. Udhëtim të mbarë!/rtsh.al/