AKU njoftoi kapjen e 27 tonëve mish pule me salmonelë dhe urdhëroi kthimin mbrapsht të saj për në Brazil, vendin e origjinës. Ndryshe nga aksionet e një dite më parë kur u bllokuan frigoriferët e ndryshkur të restoranteve kioska në bregdet, AKU në aksionin e fundit nuk tregoi se kush është subjekti që importon mish të infektuar.

Nga fillimi i vitit janë 180 ton mish i infektuar që ka ardhur në Shqipëri e më pas është kapur. Pjesa dërrmuese e këtij mishi të importuar, shkon për prodhim të nënprodukteve të tij, të cilat në treg i gjen pa etiketa për përmbajtjen dhe që shiten në kushte të rrezikshme. Sot do t’ju tregojmë se sa është kosto e vërtetë e prodhimit të një kilogram sallami të thjeshtë, që është dukshëm i ndryshëm nga ai që gjen rëndom në treg.

Gazetarja: Produktet e mishit nuk janë të preferuar vetëm nga fëmijët, por edhe të rritur këtu bëhet fjalë për sallamin, kremviçet apo salçiçet. Por çmimi varion duke u nisur edhe nga cilësisa. Në një nga marketet e vendit tonë unë mora sallamin në fjalë i cili kushton 330 lekë kilogrami. Profesor për të arritur tek produkti final cilët janë përbërësit e tjerë?

Sulaj: Për të prodhuar një sallam kërkohet që të ketë dy grupe ingredientësh. Ingredientët që vijnë nga kafsha ku është mishi dhe pjesa tjetër është ajo e ingredientëve që klasifikohen si zgjeruesit.

Gazetarja: Profesor kemi kaq shumë produkte si mund të arrijmë në një kosto 330 lekë për kilogrami për sallam? A ka një formulë?

Sulaj: Për të arritur në një kosto sa më të ulët shpesh herë prodhuesit rrisin raportin e ingredientëve më bazë jo shtazore, kryesisht me origjinë bimore. Shtimi i tyre natyrisht e ka një masë, kjo duhet të shkoj deri në 30% të peshës specifike të sallamit. Në rast se shkohet mbi këtë vlerë atëherë të shkojmë drejtë një kufiri ku humbet origjinalitetit i produktit të sallamit.