Në zgjedhjet e sapo mbyllura, PD fitoi në të gjithë vendin 454 319 vota, ose 28,84 për qind të totalit të votave të hedhura. Me këtë rezultat PD mori 43 mandate deputetësh ose 30,7 për qind të vendeve në Kuvend.

PD u rendit e para për nga numri i votave në 2 qarqe, e dyta në 9 qarqe dhe e treta në një qark.

PD garoi më një listë të vetme kandidatësh së bashku me aleatët e saj: Partinë Republikane, Partinë Bashkimi për të Drejtat e Njeriut, Partinë Agrare Ambientaliste, Lëvizjen për Zhvillim Kombëtar dhe Partinë Demokristiane të Shqipërisë.

Në zgjedhjet e vitit 2013, PD mori 528 373 vota, të cilat prodhuan 50 mandate deputetësh.

Në krahasim me vitin 2013, në këto zgjedhje PD mori të paktën 74 000 vota ose 14 për qind më pak. PD ka humbur 7 vende në Kuvend.

Tabela më poshtë përmbledh në mënyrë krahasuese rezultatet e PD-së në zgjedhjet e viteve 2013 dhe 2017.

Qarqet ku PD mbeti forcë e parë

Në zgjedhjet e vitit 2013, Partia Demokratike doli forcë e parë në katër qarqe, nga 12, në Dibër, Kukës, Lezhë dhe Shkodër.

Në këto zgjedhje, ajo arriti të ruajë vendin e parë në dy qarqe, në Kukës dhe në Shkodër.

Në Kukës, PD arriti të merrte 2 mandate nga tre me vetëm 1 777 vota më tepër se PS. Sidoqoftë në krahasim me 2013, PD ka marrë mbi 2 500 vota më pak.

Në Shkodër, PD arriti të fitojë me 1 516 vota më shumë se PS duke marrë 5 mandate, kundrejt 4 të PS-së, 1 të LSI-së dhe 1 të PSD-së. Sikurse edhe në Kukës, PD ka mbetur forcë e parë pavarësisht se ka marrë më pak vota se më 2013, mbi 5 mijë vota.

Në Dibër, PD mundi të merrte vetëm 2 nga 3 që mori në vitin 2013, duke marrë rreth 9 mijë vota më pak se 4 vjet më parë. PS mori 2 mandate, ndërsa PDIU fitoi një mandat pasi mori 12 605 vota.

Në Lezhë, në vitin 2013 PD fitoi 4 mandate, në 2017-ën u nda me vetëm 3 mandate, pasi humbi rreth 4 mijë vota.

Qarqet ku PD arriti rezultat më të dobët se në vitin 2013

Në Tiranë, Partia Demokratike arriti humbjen më të thellë të votave krahasuar me vitin 2013, por dhe me Partinë Socialiste. Kështu, në zgjedhjet 2017, PD mori rreth 72 mijë vota më pak se PS, dhe rreth 24 mijë vota më pak se në vitin 2013. Numri i mandateve të fituara është i njëjtë me atë të vitit 2013, 11 mandate, por duhet të kemi parasysh se në vitin 2013 qarku i Tiranës kishte 32 mandate, ndërsa sot ka 34 të tilla.

Në Durrës ku fitoi 41 969 vota, PD ka shënuar një tjetër nga humbjet e saj më të thella, krahasuar me vitin 2013, ku mori 52 703 vota, pra 10 734 diferencë. PD mori në këtë qark vetëm 4 mandate, krahasuar me 8 mandate të Partisë Socialiste.

Në Elbasan po ashtu, PD ka marrë 13 151 vota më pak se në vitin 2013. PD po ashtu humbi një mandat, nga 4 që kishte në këtë qark, fitoi vetëm 3.

Në Korçë, PD humbi rreth 5 mijë vota dhe një mandat, krahasuar me vitin 2013. Në këtë qark, që prej shpalljes së listave më 26 maj, pati pakënaqësi të mëdha për emrat e propozuar, veçanërisht për kandidatin e katërt, Klevis Balliun, i cili kandidonte në zonën e Pogradecit. Pavarësisht ankesave të përfaqësuesve të PD-së Korçë, Balliu do të jetë deputet në kuvendin e ardhshëm.

Në Berat, Partia Demokratike, ashtu si në 2013-ën, doli forcë e tretë, pas PS e LSI. Por në ndryshim nga viti 2013, PD kësaj radhë mori vetëm një mandat (në 2013-ën mori 2) dhe humbi rreth 3 000 vota.

Qarqet ku mori të njëjtat vota sa në vitin 2013 ose më shumë

Partia Demokratike ka mundur të marrë pothuaj të njëjtin numër votash dhe mandatesh si në vitin 2013, në qarkun e Fierit, Gjirokastrës dhe Vlorës.

Në Fier, një bastion historikisht i majtë, PD ka marrë 46 818 vota (rreth 500 vota më shumë se në 2013-ën), përkthyer në 4 mandate.

Ndërsa në Gjirokastër PD ka fituar 13 314 vota (rreth 200 vota më pak se në 2013-ën), përkthyer në një mandat.

Në Vlorë, PD ka fituar rreth 1 700 vota më shumë se në vitin 2013, por ka mundur të mbajë të njëjtin numër mandatesh, 3 të tillë.