Këshilli i Ambasadorëve Shqiptarë ka përshëndetur zhvillimin në Tiranë të Samitit për mbështetjen e kauzës së Ukrainës dhe atij për nxitjen e proceseve integruese evropiane të rajonit tonë, duke e kthyer Tiranën në një qendër të zhvillimeve rajonale dhe evropiane.

Këshilli i Ambasadorëve Shqiptarë ka njoftuar se mbështet qëndrimet e Samitit të Tiranës për Ukrainën, të shprehura në deklaratën e tij, duke kërkuar ndalimin menjëhershëm të luftës në Ukrainë, largimin e të gjitha forcave ushtarake ruse nga të gjitha territoret e pushtuara të saj, duke filluar nga aneksimi i Krimesë në vitin 2014, dhe mbajtjen përgjegjës të të gjithë atyre urdhëruesve të admnistratës së lartë ruse që kanë shkaktuar me dhjetra mijra të vrarë, dëme të konsiderueshmë materiale e morale tek populli i Ukrainës, përcjell Arbresh.info.

“KASH është i bindur se populli shqiptar do të jetë në krah të popullit të Ukrainës deri në vendosjen e plotë të paqes në këtë vend dhe kthimin e të gjitha territoreve të pushtuara tek populli dhe shteti i Ukrainës, ashtu siç edhe njihen ndërkombëtarisht.”, thuhet në njoftim.

Këshilli i Ambasadorëve Shqiptarë gjithashtu nxit të gjitha vendet e rajonit tonë, në radhë të parë qeveritë, por edhe të gjitha forcat politike, që të bashkëpunojnë në plotësimin e të gjitha reformave të nevojshme për të përfituar nga paketa e fondit prej 6 milardë eurosh të BE-së në kuadër të Planit të Përbashkët të Zhvillimit, me synim dyfishimin e ekonomive të Ballkanit Perëndimor, rritjen ekonomike të secilit vend të rajonit, krjimin e një tregu të përbashkët rajonal, të gatshëm për tu bërë në një të ardhme të afërt pjesë e tregut të përbashkët evropian.

Gjithsesi, KASH, duke u nisur edhe nga pritshmërite që opinioni publik, jo vetëm në Shqipëri, por edhe në trevat ku jetojnë shqiptarë, ka për ngjarje të tilla, apelon për takime sa më përmbajtësore, me detyra, detyrime, angazhime e afate konkrete të realizimit të tyre nga të gjitha palët.

“Këshilli i Ambasadorëve Shqiptarë vlerëson se autoritetet tona, në plotësim edhe të detyrimeve kushtetuese që kanë, duhej ta shfrytëzonin sa më efektivisht faktin që këto takime zhvilloheshin pikërisht në Tiranë, që të promovonin imazhin e njohjet ndërkombëtare të Kosovës, të theksonin kontributin e saj në forcimin e paqes e sigurisë në rajon, dhe të ishin sa më proaktivë në mbështetjen e pakushtëzuar për Kosovën në procesin e negociatave me Serbinë.”, thuhet ndër të tjera në njoftimin e KASH-it./Arbresh.info/