Ish-ministri i Jashtëm në Partinë Socialiste, Kastriot Islami ka kritikuar kryeministrin Edi Rama sa i përket menxhimit të krizës së shkaktuar nga përhapja e koronavirusit.

Në një lidhje direkte në emisionin “Quo Vadis” në Vizion Plus, Islami e cilësoi kreun e qeverisë një mashtrues që e përdor politikisht pandeminë, duke iu shkelur të drejtat qytetarëve.

Sipas tij, “mburrjet” e Kryeministrit për përballimin e kësaj situate të vështirë, janë të turpshme.

“Duhet të jesh i ndershëm me shifrat. Konkluzioni është ky: nuk është virusi që i vdes njerëzit, por vdesin nga pasojat që krijohen nga virusi. Njerëzit me imnunitet të ulët priren për t’u infektuar më lehtë. Kryeministri nuk mund të dalë e të mburret që “unë i shpëtova jetën shqiptarëve”, ky është turpi më i madh.  Në botë vdesin 12 milionë vetë nga sëmundjet kardiovaskulare, ndërkohë që kanë vdekur 1 milionë deri tani. Sërish, është shifër shumë më i vogël sesa sëmundjet kardiovaskulare.  Edhe në Shqipëri është i njëjti raport: janë 12 mijë veta që vdesin në vit dhe 4000-4500 nga tumoret. Edi Rama mashtron gjatë gjithë kohës për menaxhimin e kësaj krize. Për më tepër është akuzuar se e përdor këtë fazë për të rritur autoritetin e tij politik, duke dhunuar të drejtat e njeriut.”

I pyetur lidhur me vendimin e qeverisë për mbajtjen e maskave me detyrim edhe në ambientet e hapura, Islami e sheh plot dyshim marrjen e këtij vendimi pikërisht tani, në një kohë kur kulmi i pandemisë është tejkaluar.

“Rama shpeshherë thoshte mos i mbani maskat se nuk ju siguron, e tani kalon në ekstremin tjetër: vendos masa policore dhe masa me vendim të njëanshme. Shqiptarët janë më të varfërit në Evropë dhe ndër më të varfërit në botë. Maska kushton. Është e mira që të mbrohen, sepse ky virus është i vërtetë, pavarësisht ekzagjerimeve dhe konspiracioneve. Në Shqipëri ka një tendencë për të luajtur me shifrat. Vdekjet mundohen që të jenë të ulëta.”/vizionplus/