Policia malazeze ka identifikuar tre persona të cilët dyshohet se sulmuan tre shqiptarët të shtunën në rrugën kryesore të qytetit të Zelenikës në Mal të Zi.

Drejtoria e Policisë ka bërë të ditur se sipas informacioneve të deritanishme, sherri mes tyre që degradoi në dhunë fizike nisi në trafik, transmeton Arbresh.info.

“Sot në orët e pasdites përmes telefonit është raportuar në shërbimin kujdestar të Departamentit të Sigurisë Herceg Novi se në rrugën kryesore në qytetin e Zelenikës ka ndodhur shkelje e rendit dhe qetësisë publike nga disa persona të panjohur. Efektivët janë dërguar në vendngjarje ku kanë konstatuar tre persona, të gjithë shtetas shqiptarë, të cilët kanë pasur lëndime të dukshme, të cilët më pas janë drejtuar për të kërkuar ndihmë mjekësore. Policët kanë ndërmarrë veprime në kuadër të juridiksionit të tyre për të përcaktuar të gjitha rrethanat në të cilat persona të lënduar, dhe për të zbardhur ngjarjen. Përveç pamjeve video nga kamerat e vëzhgimit nga objektet pranë ngjarjes”, thuhet në njoftim, shkruan Vijesti.

Lexo edhe:

​Tre të rinj shqiptarë rrihen nga persona me uniformë ushtarake në Mal të Zi

Shtohet se efektivët e policisë kanë identifikuar tre persona nga Herceg Novi si autorë të sulmit fizik, identiteti i të cilëve ende nuk është publikuar.

“Për ngjarjen është njoftuar prokurori kompetent, ku pritet marrja e masave dhe veprimeve të mëtejshme në lidhje me këta persona, por edhe për identifikimin e autorëve të tjerë të mundshëm, për të cilët publiku do të njoftohet më vonë. Sipas informacioneve të deritanishme, ka qenë një ngjarje e situatës në trafik”, sipas njoftimit të policisë.

Kujtojmë se tre të rinjtë shqiptarë Klodjan Meaj, Azem Dervishi dhe Doris Kopaci, të cilët ishin nisur për në Gjermani janë dhunuar brutalisht sapo kanë zbritur nga trageti në Kotorr.

Lajmi u denoncua përmes rrjeteve sociale nga familjarët e tyre, të cilët pretendojnë se ata u dhunuan nga 8 persona të veshur me veshje ushtarake.

Lexo edhe:

Balla pas rrahjes së shtetasve shqiptarë në Mal të Zi: Po kryhet një hetim i plotë