“Giro D’Italia” do përshkojë 339.7 kilometra në Shqipëri

13:48 | 14 Janar 2025
E.H

Shqipëria ka hyrë prej kohësh në skenën e madhe të sportit. Pas finales së Konferencë Ligës që u zhvillua në Tiranë në vitin 2022, të gjithë sytë do të drejtohen në këtë vend, që në fillim të majit do t’i japë “startin” edicionit të 108 të “Giro D’Italia”, një prej garave më të vjetra dhe më të famshme të çiklizmit botëror.

Pas prezantimit në Romë, ku mori pjesë edhe kryeministri Edi Rama, zyrtarizimi i itinerarit ka marrë një vëmendje të madhe mediatike, në Itali dhe gjithë botën.

Të përditshmet përtej Adriatikut, e cilësojnë që tani një sukses “Xhiron e Italisë 2025”. Një “Xhiro Përrallë” titullohet që në faqen e parë gazeta më e madhe sportive “la Gazzetta Dello Sport”, ndërsa të përditshmet e tjera i japin zë shifrave të këtij edicioni, që pritet të ndiqet nga rreth 700 milionë spektatorë nga 200 vende të ndryshme të botës.

E këto pritshmëri do të nisin nga Durrësi më 9 maj, ndërsa tre etapat e para do të zhvillohen në Shqipëri.

Qindra çiklistë dhe mijëra të tjerë, pjesë e stafeve të skuadrave dhe tifozët e tyre do të përshkojnë 339.7 kilometra, në itinerarin që përfshin Tiranën dhe Vlorën bashkë me mrekullitë e rivierës shqiptare.

Më pas “Xhiro” do të transferohet në Itali ku do të zhvillohen edhe 18 etapat e tjera, që do të përshkojnë mijëra kilometra deri në vijën e finishit në Romë më 1 qershor, ku do të kurorëzohet edhe fituesi i edicionit të 108 të garës së famshme të çiklizmit. /abcnews.al

Shpërndaje në rrjete sociale

Të ngjashme

Foto lajm