Mbrëmjen e djeshme Ministri i Jashtëm i Greqisë Nikos Kotzias deklaroi në televizionin ERT se në negociatat me palën shqiptare, ishte arritur një marrëveshje për zgjerimin me 12 milje të paktit detar në favor të shtetit helen.

Lajmi ishte i papritur për Shqipërinë, pasi pala vendase nuk kishte dhënë asnjë informacion në lidhje me negociatatat e kryera mes Bushatit e Kotzias mbi paktin detar. Qeveria shqiptare pre kohësh e kishte vënë theksin tek ligji i luftës dhe tek fakti se do të jemi shumë shpejt para faktit të kryer, se ky ligj do të hiqet nga Greqia.

Por Kotzias me deklaratën e tij mbi paktin detar ka trazuar jo pak politikën vendase, duke bërë që Ministria e Jashtme të reagojë vetëm këtë pasdite përmes një deklarate që theksin e ka vënë tek fakti se negociatat do të bëhen duke u bazuar në të drejtën ndërkombëtare.

Pavarësisht deklaratës, sërish duket se qeveria nuk është e qetë, pasi në mbrëmje pritet që vetë Ministri Bushati të japë “llogari” në emisionin “Opinion” të gazetarit Blendi Fevziu.

Klan ka publikuar një pjesë të intervistës që do të transmetohet këtë mbrëmje në orën 10:00, ku Bushati shprehet se nuk ka deri më tani asnjë marrëveshje për detin, por vetëm një diskutim në parim për “linjat e kuqe” të paktit të shumëpërfolur të vitit 2009. Përveçse kësaj deklarate dhe të tjerave që do të zbulohen vonë në darkë, Bushati ka thënë gjithashtu se marrëveshja që do të arrihet do të jetë më e mirë se ajo e vitit 2009, e kryer nga qeveria Berisha.

“Unë po ju them edhe një herë tjetër qartë dhe shkoqur, ne kemi diskutuar në parim për linjat e kuqe, përmes të cilave dhe përtej të cilave ne nuk dalim dot. Po ju them që marrëveshja do të jetë disa herë më e favorshme se marrëveshja që është arritur në 2009. Do të ulen ekspertët në tavolinë, sepse ekspertët nuk janë ulur në tavolinë dhe do të ãnalizojnë marrëveshjen”, tha Bushati./Gazeta Express