Kreu demokratik, Sali Berisha ka komentuar tensionet në Kuvendin e Shqipërisë, me ç’rast deputetët e PD-së u kanë vënë zjarrin karrigeve të sallës së Kuvendit.

“Deputetët e PD i dhanë sot përgjigjen e merituar Edi Ramës, duke nisur betejën e cila ndalet vetëm me fitoren e opozitës”, ka thënë Berisha gjatë një fjalimi nga ballkoni i shtëpisë së tij.

Ai u bëri thirrje demokratëve të ngrihen deri të mosbindje civile.

“Sot deputetët e PD-së, nisën betejën, betejën e cila ndalet vetëm me fitoren e opozitës. Ajo betejë duhet të frymëzojë çdo demokrate, demokrat, çdo qytetare e qytetar të këtij vendi, për tu ngritur në një betejë në mosbindje civile më te gjitha mjetet e saj. Për shpëtimin e Shqipërisë nga krimit, mafia, vjedhja. Qeveri teknike, zgjedhje të lira. Rotacionin, fitoren e opozitës. Deputetët e opozitës sot u thanë kriminelëve me pushtet, Edi Ramës në parlament, në qeveri në prokurori dhe gjykata e kudo që janë, se është radha jonë dhe se forcë në botë nuk ka që të na ndalë ne pa realizuar qëllimet tona”, tha Berisha.

Sipas Berishës, kjo është një betejë për të shpëtuar kombin shqiptar, nuk është betejë për Salianjin, apo ndonjë parti politike.

“Kjo është një betejë për të shpëtuar kombin shqiptar, nuk është një betejë kjo për Ervin Salianjin, as për një njeri tjetër, është një betejë kjo për një parti politike. Kjo është një betejë për mbarë shoqërinë shqiptare. Kjo është një betejë për fatin e Shqipërisë. Ata të cilët projektuan shkatërrimin e kombit me shkatërrimin e opozitës, do të marrin në flaket e kësaj lëvizje, përgjigjen përfundimtare. Dhe do të marrin kur në çdo skaj, në çdo shesh, në çdo rrugë, qytetarët të ngrihen në mosbindje civile. Kur Shqipëria të jetë e tëra në duart e tyre, dhe jo në duart e këtyre kriminelëve mafiozë dhe mafias ndërkombëtare që kërkon me çdo kusht, kombin shqiptar ta mposhtë, ta shkatërrojë me drogë, korrupsion, vjedhje”, tha Berisha./A2cnn

Lexo edhe:

Deputetët e PD-së i vënë flakën karrigeve jashtë Kuvendit të Shqipërisë