Kryetari i PD-së, Sali Berisha, ka reaguar përmes një postimi në Facebook për tensionin në veri të Kosovës.

Ai ka thënë se Vuçiq ka angazhuar fallangat e tij kriminale të dërguara nga Beogradi dhe bandat serbe lokale, në veprime të dhunshme kundër ushtarëve të KFOR-it.

“Të dashur miq, Presidenti i serbomadhisë ka angazhuar fallangat e tij kriminale të dërguara nga Beogradi dhe bandat serbe lokale, në veprime të dhunshme kundër ushtarëve të KFOR-it, gazetarëve dhe policisë së Kosovës që po mbajnë rendin dhe sigurinë në komunat me shumicë serbe në veri të Kosovës. Gjatë shpërndarjes së protestuesve serbë në këto komuna, ushtarët e KFOR-it janë sulmuar nga kriminelë me maska, me dhjetëra shok-bomba, mjete të forta dhe lëndë të tjera djegëse, shishe molotov, janë dëgjuar dhe të shtëna me armë. Dënoj me ashpërsinë më të madhe këtë skenar të bashkrenduar të Beogradit me Kremlinin, sulmet kriminale të fallangave të gangsterëve serb kundër KFOR-it, ushtarëve të tij, gazetarëve dhe policisë së Kosovës”, ka shkruar ai.

Qytetarë serb kanë protestuar sot në Zveçan, Leposaviq dhe Zubin Potok kundër zgjedhjes së kryetarëve shqiptar në këto tri komuna.

Protestat kanë qenë të dhunshme të Zveçan ku është dashur edhe ndërhyrja e KFOR-it.

Kujtojmë se rreth 25 ushtar të KFOR-it kanë mbetur të lënduar nga protesta e cila po vazhdon edhe në këto momente./Arbresh.info/