Zëvendëskryeministrja e Shqipërisë, Belinda Balluku bashkë me Ministrin e Mbrojtjes, Pirro Vëngu kanë monitoruar se si po pastrohen bregdetet e Jugut.

Përmes një postimi në Facebook, Balluku ka shkruar se i’u janë bashkuar aksionit të punonjësve të bashkive për pastrimin e disa prej plazheve më të frekuentuar gjatë këtij sezoni veror.

“Ne e konsiderojmë në këto momente të një rëndësie të veçantë ndërhyrjen e ushtrisë, qoftë nga toka, me trupat që mund të ndihmojnë bashkitë, por qoftë dhe nga deti. Ndërkohë që do të duhet, nga çfarë po kuptohet, që pas përfundimit të sezonit të bëjmë një analizë të mirëfilltë të të gjithë situatës për të nxjerrë mësime nga ky numër i shtuar sepse çdo vit nga sa kuptohet ne arrijmë që të identifikojmë të tjera pika të dobëta që dalin në sipërfaqe. Sezoni i vitit të kaluar u mbyll me sukses, u mitiguan të gjitha problematikat që u vunë re gjatë atij sezoni, por këtë vit me një numër të shtuar, një numër ekspansional për Shqipërinë, të vizitorëve, sigurisht ne po zbulojmë pika të tjera të dobëta të cilat nuk kanë qenë shfaqur më parë dhe duhen mitiguar sa më shpjet, brenda këtij sezoni. Dhe ne duhet të jemi të përgatitur për sezonin tjetër”, tha Balluku.

Ndër të tjera, ajo tha se ndërgjegjësimi i qytetarëve dhe operatorëve turistik është shumë i rëndësishëm sa i takon administrimit dhe mbajtjes pastër të plazheve./Arbresh.info/