Tetë të lënduar është bilanci i një aksidenti regjistruar mbrëmjen e kësaj të enjteje në Shijak.

Rreth orës 20:00, një mjet tip ‘Benz’ ka përplasur një motor me rimorkio në vendin e njohur si “4 rrugët e Shijakut”.

Për pasojë kanë mbetur të lënduar 8 shtetas, të cilët ndodheshin në rimorkio në momentin e përplasjes.

Në pamjet e siguruara shihen 2 autoambulancat që kanë mbërritur në vendin e ngjarjes dhe që bënë të mundur transportimin e të plagosurve për në SRD.

Burime pranë bluzave të bardha bëjnë me dije se gjendja e tyre shëndetësore paraqitet e qëndrueshme dhe ndodhen jashtë rrezikut për jetën.

Drejtuesi i mjetit, i identifikuar me inicialet D.K është shoqëruar për veprime të mëtejshme, ndërsa grupi hetimor po punon për zbardhjen e plotë të rrethanave të ngjarjes.

Njoftimi:

Shijak/Informacion paraprak

Me datë 28.10.2021, rreth orës 20:00, në Shijak, mjeti tip “Benz”, me drejtues shtetasin D. K., është përplasur me një motomjet me rimorkio.

Si pasojë e përplasjes janë lënduar 8 shtetas që ndodheshin në rimorkio, të cilët ndodhen nën kujdesin e mjekëve jashtë rrezikut për jetën.

Drejtuesi i mjetit shtetasi D. K., është shoqëruar në ambientet e Policisë për veprime të mëtejshme.

Grupi hetimor ndodhet në vendngjarje dhe po punon për zbardhjen e rrethanave të aksidentit.