Pas dështimit të tre raundeve, ditën e sotme do të mblidhet Konferenca e Kryetarëve për të përcaktuar raundin e katërt për zgjedhjen e kreut të ri të shtetit. Raundi i fundit, ku presidenti mund të zgjidhej me shumicë votash u ezaurua dje, ndërsa nuk u dërgua asnjë emër në Kuvend.

Konferenca e Kryetarëve do të mblidhet në orën 14:00. Këtë herë është radha e socialistëve që të sjellin propozimet e tyre, pasi sipas marrëveshjes në të parat duhet të propozonte opozita.

Megjithatë, opozita nuk depozitoi asnjë emër në Kuvend, pasi u tërhoq nga marrëveshja sepse e konsideroi si të shkelur nga PS.

Në këtë mënyrë iu hap edhe rruga socialistëve. Në raundin e katërt, maxhoranca nëpërmjet Taulant Ballës kja paralajmëruar se do të jetë ajo që do të propozojë emra për pasuesin e Ilir Metës.

Me ezaurimin e tre raundeve të para dështoi edhe mundësia për të zgjedhur një president konsensual. Presidenti i ardhshëm i pesë viteve duket se do të vijë nga votat e socialistëve në Kuvend.

Kujtojmë se me ndryshimet kushtetuese të vitit 2008 presidenti zgjidhet në raundet e fundit vetëm me 71 vota, duke mos kërkuar kështu konsensus të detyruar. g.v/abcnews.al