Alkooli dhe shpejtësia përgjatë fundjavës, angazhojnë Policinë Rrugore me patrullime dhe kontrolle të shtuara me përzgjedhje.

Nisur nga rrezikshmëria që karakterizon kryeqytetin përgjatë fundjavës, për shkak të drejtimit të mjetit pas përdorimit të alkoolit, me shpejtësi mbi normat e lejuara apo edhe në shkelje të tjera po aq të rrezikshme për drejtuesit e mjeteve dhe të tjerët, Policia Rrugore e Tiranës në bashkëpunim me Njësinë Operacionale të Sigurisë së Autostradave, ka organizuar patrullime të kombinuara duke përdorur të gjitha pajisjet speciale dhe me burime njerëzore të shtuara në numër, me qellim parandalimin e aksidenteve rrugore dhe verifikimin e procedimin e shkeljeve që janë burim për ngjarje rrugore me pasoja për jetën dhe shëndetin e përdorueseve të rrugës.

“Në funksion të kontrolleve parandaluese, deri në këto momente, janë evidentuar dhe arrestuar në kushtet e flagrancës 4 drejtues mjetesh, nga të cilët 3 për drejtim mjeti në gjendje të dehur dhe 1 për largim nga vendi i vuajtjes së dënimit.

“Janë pezulluar 23 leje drejtimi, nga të cilat 15 për shpejtësi mbi normat e lejuara dhe 8 për drejtim mjeti nën efektin e alkoolit. Janë proceduar administrativisht 13 drejtues mjetesh për mosrregullim shpejtësie në qendrat e banuara dhe gara në shpejtësi. Gjatë patrullimeve dhe veprimeve policore të kombinuara janë kontrolluar fizikisht për sende të paligjshme 24 automjete të ndryshme dhe 34 persona”, thuhet në njoftimin e policisë.

Policia sqaron se nga kontrollet me radar dhe me drager rezulton se shumë drejtues mjetesh dhe motomjetesh e trajtojnë rrugën si pistë.