Të gjithë shqetësohemi herë pas here, por, nëse nuk qetësoheni menjëherë ose shqetësoheni edhe për gjëra të vogla në punë apo në shtëpi, flisni me mjekun.

Shqetësimi dhe ankthi i shpeshtë mund të ndikojnë në shëndet dhe lidhen me një çrregullim të ankthit.

Ja çfarë mund të shkaktojë shqetësimi në trup!

Sistemi nervor

Ky rrjet mesazhesh përfshin trurin, palcën kurrizore, nervat dhe qeliza speciale të quajtura neurone. Shqetësimi i tepërt mund ta nxisë këtë rrjet të prodhojë hormone të stresit, të cilat përshpejtojnë rrahjet e zemrës dhe frymëmarrjen, rrisin nivelet e sheqerit në gjak dhe transportojnë më shumë gjak në krahë dhe këmbë. Me kalimin e kohës, mund të ndikojnë në zemër, enët e gjakut, muskujt dhe sisteme të tjera.

Muskujt

Kur jeni të shqetësuar për diçka, mund të sforcohen muskujt në kraharor dhe qafë, duke rritur rrezikun për shfaqjen e dhimbjes së kokës dhe migrenës. Masazhimi ose teknikat e relaksimit, si frymëmarrja e thellë dhe joga, mund të ndihmojnë për t’u qetësuar.

Frymëmarrja

Kur jeni shumë të shqetësuar, mund të merrni frymë më thellë ose më shpesh seç mund ta kuptoni. Kjo mund të bëhet serioze nëse keni tashmë probleme me frymëmarrjen, si astma, probleme me mushkëritë ose gjendje të tjera.

Zemra

Të shqetësuarit gjatë gjithë kohës mund të ndikojë edhe në zemër, duke rritur rrezikun për zhvillimin e tensionit të lartë të gjakut, atakut në zemër ose goditjes në tru. Nivelet e larta të ankthit mund të nxisin edhe prodhimin e hormoneve të stresit, që shkaktojnë shpejtim të rrahjeve të zemrës. Nëse kjo ndodh shpesh, mund të inflamohen enët e gjakut, duke çuar në sforcim të mureve arteriale, rritje të niveleve të kolesterolit dhe probleme të tjera.

Sheqer në gjak

Kur jeni të shqetësuar për diçka, hormonet e stresit mund të rrisin nivelet e sheqerit në gjak/ Nëse jeni mbipeshë ose vuani nga diabeti, nivelet e sheqerit në gjak mund të mbeten të larta për një kohë të gjatë, duke rritur rrezikun për zhvillimin e sëmundjeve të zemrës, goditjes në tru ose sëmundje të veshkave.

Sistemi imunitar

Ndikimet fizike të shqetësimit në trup dobësojnë sistemin imunitar, duke vështirësuar luftimin e viruseve dhe mikrobeve. Kështu, nëse vuani nga gripi, herpesi apo viruse të tjera, do ta keni më të vështirë që të shëroheni nëse shqetësoheni gjatë gjithë kohës apo vuani nga ankthi.

Dhimbje në stomak

Mund të ndieni “flutura në stomak” kur jeni nervoz, ndërsa në raste më të rënda, mund të keni të përziera ose edhe të vjella. Nëse kjo ju ndodh shpesh, mund të çojë në shfaqjen e dhimbjeve të stomakut apo zhvillim të ulcerës në stomak. Dhe, nëse konsumoni shumë ushqime të larta në yndyra ose sheqer, stomaku duhet të punojë fort për t’i tretur, prandaj prodhon më shumë acid dhe mund të shkaktojë refluks acid.

Zorrë

Ankthi dhe shqetësimi i vazhdueshëm mund të ndikojnë në zakonet e jashtëqitjes – mund të vuani nga diarreja ose kapsllëku. Dieta, aktiviteti fizik dhe ilaçet mund t’ju vijnë në ndihmë, megjithatë, është e rëndësishme që të gjeni mënyra për të lehtësuar ankthin.

Shëndeti seksual

Shqetësimi dhe ankthi mund t’ju bëjë më pak të interesuar për të kryer marrëdhënie seksuale. Me kalimin e kohës, mund të ulë nivelet e testosteronit te meshkujt, duke ndikuar në zhvillimin e spermës ose ngadalësuar ose ndaluar reagimin normal të trupit kur do që të kryejë marrëdhënie seksuale. Për gratë në fazën e menopauzës, ankthi dhe shqetësimi mund të përkeqësojnë afshet e nxehta dhe problemet me gjumin.