Hulumtimet e reja sugjerojnë se një shenjë paralajmëruese e hershme për sëmundjen e Parkinsonit mund të ndodhë ndërsa ne jemi në gjumë.

Aktorit dhe yllit të filmit “Back to the Future”, Michael J Fox, i ishte thënë se vuan nga kjo sëmundje kur ishte 29-vjeç, por shumica e rasteve diagnostikohen pas moshës 60-vjeçare, transmeton portal arbresh.info

Një në 37 persona preken nga kjo sëmundje gjatë jetës, kështu që është thelbësore të dallojmë çdo shenjë paralajmëruese të hershme,  njëra prej të cilave mund të jetë përjetimi i ëndrrave të këqija ose makthi.

Studimi i kryer nga Universiteti i Birminghamit dhe i botuar në revistën eClinicalMedicine sugjeron se burrat e moshuar që shpesh shohin ëndrra të këqija kishin dy herë më shumë gjasa të diagnostikoheshin më vonë me Parkinson.

“Megjithëse mund të jetë vërtet e dobishme të diagnostikosh herët sëmundjen e Parkinsonit, ka shumë pak tregues rreziku dhe shumë prej tyre kërkojnë teste të shtrenjta spitalore ose janë shumë të zakonshme dhe jo specifike, si p.sh. diabeti”, tha autori kryesor i studimit, Dr Abidemi Otaiku.

“Ndërsa ne duhet të bëjmë kërkime të mëtejshme në këtë fushë, identifikimi i rëndësisë së ëndrrave të këqija dhe maktheve mund të tregojë se individët që përjetojnë ndryshime në ëndrrat e tyre në moshë më të madhe duhet të kërkojnë këshilla mjekësore”, tha ai.

Gjetjet e ekipit u bazuan në studimin e të dhënave të grupeve të mëdha të më shumë se 3,800 burrave të moshuar në Amerikë për një periudhë prej 12 vjetësh.

Studiuesit pretendojnë se studimi tregon se si ëndrrat mund të zbulojnë detaje të rëndësishme për shëndetin e trurit dhe strukturën e tij.

Ndërsa ëndrrat mund të jenë një tregues i hershëm i sëmundjes së Parkinsonit, është jetike të theksohet se ato nuk janë domosdoshmërisht një simptomë.

Simptomat kryesore të sëmundjes së Parkinsonit janë:

Dridhja e duarve

Ngurtësia e muskujve

Ngadalësimi i lëvizjes

Simptomat e mësipërme janë shenjat më të shpeshta, por sëmundja e Parkinsonit mund të shkaktojë një sërë simptomash që variojnë nga ato fizike deri tek ato psikologjike.

Fatmirësisht, ekzistojnë disa terapi mbështetëse si fizioterapia dhe terapia e të folurit dhe gjuhës./arbresh.info/