Një dietë e shëndetshme dhe e ekuilibruar duhet të na sigurojë lëndët ushqyese që na nevojiten. Megjithatë, nëse nuk është kështu, mungesa e vitaminave dhe mineraleve mund të shkaktojë dhimbje në trupin tonë. Kështu, mungesa e vitaminës B12 mund të shkaktojë dhimbje në gojë.

Shërbimi Kombëtar i Shëndetit (NHS) ka paralajmëruar njerëzit se një simptomë e dhimbshme në gojë mund të tregojë një mungesë serioze dhe madje potencialisht të rrezikshme të vitaminës B12.

Vitamina B12 është një lëndë ushqyese e tillë që mund të shkaktojë probleme reale nëse keni mungesë. Ajo gjendet kryesisht në produktet shtazore si mishi, djathi dhe vezët, kështu që nuk duhet të jetë për t’u habitur që mungesa e kësaj vitamine është një dukuri e zakonshme tek veganët dhe vegjetarianët.

Është e nevojshme për të mbajtur gjak të shëndetshëm dhe qeliza nervore në trupin tuaj. Pa të, qelizat e gjakut nuk mund të bartin oksigjenin siç duhet, gjë që mund të çojë në anemi.

Simptomat e zakonshme të mungesës së vitaminës B12 përfshijnë lodhjen, ndjesi shpimi gjilpërash dhe humbje peshe. Por dy shenja që shfaqen në gojën tuaj mund të sugjerojnë gjithashtu se ju mungojnë lëndët ushqyese.

NHS thotë se një gjuhë e lënduar dhe e kuqe, e quajtur mjekësisht glossitis, mund të jetë një shenjë e mungesës së vitaminës B12. Kur një person ka glossitis, gjuha ndryshon ngjyrën dhe formën, duke e bërë atë të dhimbshme, të kuqe dhe të fryrë.

Inflamacioni gjithashtu e bën gjuhën të duket e lëmuar, pasi gungat e vogla në gjuhë që përmbajnë sythat e shijes shtrihen dhe zhduken. Ulçera në gojë janë gjithashtu një simptomë e mundshme.

Shenja të tjera që duhen kërkuar përfshijnë: frymëmarrje të shpejtë ose gulçim, dhimbje koke, dispepsi, humbje oreksi. palpitacione, probleme me shikimin, ndjesi të dobët ose të lodhur, diarre dhe probleme me kujtesën, të kuptuarit dhe gjykimin.

Në disa raste, mungesa e vitaminës B12 mund të shkaktojë gjithashtu simptoma që ndikojnë në trurin dhe sistemin tuaj nervor si: mpirje, dobësi muskulore, probleme psikologjike (mund të variojnë nga depresioni ose ankthi i lehtë, deri te konfuzioni dhe çmenduria) dhe probleme me ekuilibrin dhe koordinimin.

Mungesa ka qenë gjithashtu e lidhur me infertilitetin, kancerin e stomakut dhe defektet e lindjes. Nëse keni simptoma të mungesës së B12 dhe ndryshimi i dietës suaj nuk ka bërë ndonjë ndryshim, duhet të flisni me mjekun tuaj të përgjithshëm. Ata mund të dëshirojnë të testojnë gjakun tuaj për të kontrolluar për mungesë.