Një grup personash janë futur pasditen e sotme në Bashkësinë Fetare Islame me pretekstin se Gjykata Themelore Shkup ka marrë vendim për shkarkimin e kryetarit të BFI-së Sulejman Rexhepi.

Grupi i cili është futur në BFI këmbëngul se Gjykata Themelore Shkup 2 ka pranuar kërkesën që kryetar i ri i BFI-së të jetë Skender Buzaku dhe se vendimi gjatë ditës së nesërme do të shpallet në Gazetën Zyrtare.

Sipas vendimit në të cilin thirret Buzaku “Në të ardhmen ushtrues i detyrës reis ulema i Shoqatës vullnetare të personave fizik me emrin Bashkësia Fetare Islame me seli në Shkup do ta kryejë Skender Buzaku nga Shkupi. Sipas vendimit, dorëzuesi i kërkesës ka shtruar procesverbalin nga mbledhja e jashtëzakonshme të Riasetit të BFI-së e mbajtur më 30.03.2019, vendimin për shkarkimin e kreut të BFI-së, Sulejman Rexhepi dhe dorëheqjen e parevokueshme të Sulejman Rexhepit e dhënë sipas vendimit më 25 mars të vitit 2019 dhe vendimin e datës 30 mars për zgjedhjen e Buzakut në pozitën e kreut të BFI-së”.

Për rreth godinës së Bashkësisë Fetare Islame ka edhe forca të shtuara policore.

Bashkësia Fetare Islame pas ngjarjeve këmbëngul se kreun e BFI-së nuk mund ta shkarkojë Gjykata por vetëm organet e Riasetit.

Sipas BFI-së kreu mund të shkarkohet vetëm me vendim të Sulejman Rexhepit, i cili emëron pasuesin e tij dhe më pas Gjykata konstaton shkarkimin dhe emërimin e kreut të ri.

Ndërkohë në një deklaratë për mediat Skender Buzaku tha se bashkë me ta brenda selisë së BFI-së ndodhet edhe policia financiare.

Ai tha se është kryetar i ri i Bashkësisë Islame dhe se nga nesër do të nis punën dhe përgënjeshtroi se bëhet fjalë për PUÇ në BFI. Grupi i njëjtë edhe para disa viteve ka tentuar që ta shkarkojë kreun aktual të BFI-së, Sulejman Rexhepi./alsat m